अमेरिका–चीन व्यापारिक युद्ध मेगु लँपु
संयुक्त राज्य अमेरिकाय् डोनाल्ड ट्रम्प राष्ट्रपति जुया वःगु निदँ फुइत आः थ्यमथ्यं स्वला हे जक ल्यं दनि । थ्व ई दुने ट्रम्प न्ह्याबलें चर्चाया शिखरय् हे लानाच्वन । गुबलें छु, गुबलें छु कारणं वयागु चर्चा हे जुयाच्वन । तर गुलि नं चर्चा जुयाच्वन नकारात्मक रुपं हे जक जुयाच्वन । राष्ट्रपति जुइ न्ह्यः ट्रम्पया गुगु छवि दुगु खः, राष्ट्रपति जुइ धुंकाः नं अज्याःगु हे छवि खनेदयाच्वन ।
राष्ट्रपति ट्रम्प दकलय् आलोचित जुयाच्वंगु धयागु हे वं न्ह्याकाच्वंगु घृणाया राजनीतिया कारणं खः । राष्ट्रपति जूगु छुं ई लिपा हे न्हय्गू मुस्मां देय्तय्त अमेरिका दुहां वयेगुलिइ प्रतिबन्ध तयाः न्ह्याकूगु घृणाया राजनीति झं झं तच्वया वनाच्वंगु दु । राष्ट्रपति जूगु निला मदुनिवं हे ट्रम्पं इरान, इराक, सिरिया, सुडान, लिबिया, सोमालिया व यमन यानाः न्हय्गू मुस्मां देय्यात नागरिकतय्त अमेरिका दुहां वयेगुलि प्रतिबन्ध तयेत स्वःगु खः ।
मात्र मुस्मां जूगु कारणं, अले मुस्मांत आतंकवादी जुइफु धयागु कारण क्यनाः ट्रम्पं थुपिं देय्या नागरिकतय्त अमेरिका दुहां वयेगुलि प्रतिबन्ध तयेगु कुतः यात । तर उबलय् अमेरिकी अदालतं ट्रम्पयात कुतःयात असफल यानाबिल । थःम्हं क्वत्यलेफुगु, कमजोर देय्त प्रति ट्रम्पं न्ह्याकूगु थ्व घृणाया राजनीति आः अमेरिका लिसे धेंधेंबल्लाः याः वयाच्वंगु तःधंगु देय् पाखे नं लक्षित जूवनेधुंकूगु दु ।
विशेषतः ट्रम्पं आः चीनयात नं थज्याःगु हे मिखां स्वयेगु यानाहःगु विश्व राजनीतिइ ध्यान तयाच्वंपिंसं धायेगु याना हयेधुंकूगु दु । ट्रम्पं चीनलिसे सुरु याःगु व्यापारिक युद्ध आः छपलाः च्वन्ह्यानाः मेगु हे लँपुइ वनेधुंकूगु विश्लेषण जुयाच्वंगु दु । अमेरिकाय् वइगु नोवेम्भर ६ तारिखय् जुइत्यंगु मध्यावधि चुनावय् चीनं हस्तक्षेप यानाच्वंगु द्वपं बियाः ट्रम्पं चीनलिसेया न्ह्यानाच्वंगु व्यापारिक युद्धयात मेगु हे लँपुइ न्ह्याकेत स्वःगु दु ।
ट्रम्पं आः चीनयात नं अमेरिकाया स्वतन्त्रता, प्रजातन्त्रया निंतिं खतरा दुगु देय् कथं स्वयेगु यानाहःगु विश्लेषकतय् धापु दु । ट्रम्पं छुं न्हि न्ह्यव जूगु संयुक्त राष्ट्र संघया सुरक्षा परिषद्या बैठकय् आकाझाकां हे चीनं अमेरिकाया चुनावय् हस्तक्षेप यानाच्वंगु द्वपं बियाः सकसितं अचू चायेकाबिउगु खः । सुरक्षा परिषद्या बैठकय् छुं एजेन्डा हे मखयेक आकाझाकां विश्व नेतातय् न्ह्यःने राष्ट्रपति ट्रम्पं चीनयात बिउगु थ्व द्वपंयात सामान्य रुपं कयाच्वंगु मदु ।
परमाणु हतियार, जैविक हतियार गुकथं पनेगु धयागु विषयय् सहलह जुयाच्वंगु बैठकय् ट्रम्पं चीनयात लक्षित यानाः धाःगु खः, ‘चीनं नोवेम्भरय् जुइत्यंगु चुनावय् जिगु विरुद्ध हस्तक्षेप यायेगु कुतः यानाच्वंगु दु ।’चीनलिसे थःम्हं न्हापांखुसी व्यापारिक मुद्दाय् हाथ्या बियागु व चीन विरुद्ध व्यापारिक लिसें हरेक मुद्दाय् थःपिं त्यानाच्वंगुलिं चीनं चुनावय् थः विरुद्ध हस्तक्षेप यानाच्वंगु द्वपं ट्रम्पं बिउगु खः ।
चीनं अमेरिकी चुनावय् हस्तक्षेप यानाच्वंगु द्वपं बिउम्ह ट्रम्पं उबलय् छुं प्रमाण धाःसा मबिउ । थथे विनाप्रमाण ट्रम्पं न्ववाःगु धापुतिं अमेरिकां चीनयात नं रुस, इरान, उत्तर कोरियाया धलखय् तयेयंकूगु खनेदु । रुस, इरान, उत्तर कोरिया अमेरिकाया परम्परागत दुश्मन देय् खः । अमेरिकां थुपिं देय्पाखें थःपिनि स्वतन्त्रता व प्रजातन्त्रय् खतरा दु धकाः धया वयाच्वंगु खः ।
आः चीनयात कयाः ट्रम्पं बिउगु द्वपनं चीनयात नं थ्व हे धलखय् तयेहःगु खः ला धयागु अनुमान जुयाच्वंगु दु । विशेषत चीन मेपिनिगु देय्या आन्तरिक मामिलाय् हस्तक्षेप मयाइगु देय्या रुपय् म्हसीका दुगु देय् खः । ट्रम्पया द्वपंयात कयाः चीनं नं थ्व हे धयाः खण्डन यायेधुंकूगु दु । चीनया विदेशमन्त्री वाङ यीं ट्रम्पया थ्व द्वपं आधारहिन धासें चीनं गुबलें नं मेपिनिगु देय्या आन्तरिक मामिलाय् हस्ताक्ष मयाः धाःगु दु ।
मेखे ट्रम्पं धाःसा चीनयात सुनियोजित रुपं आक्रमण यानाच्वंगु दु । सुरक्षा परिषदय् आकाझाकां चीनं अमेरिकाय् जुइत्यंगु चुनावय् हस्तक्षेप यायेत्यंगु द्वपं बिउसां थ्वयां न्ह्यव हे ट्रम्पया सल्लाहकारतय्सं चीनयात थज्याःगु द्वपं बीधुंकूगु खः । अमेरिकी राष्ट्रिय सुरक्षा सल्हाकार जन बोल्टनं थ्वयां न्ह्यव हे इरान, रुस, उत्तर कोरिया लिसें चीनं नं अमेरिकी चुनावय् हस्तक्षेप यायेगु कुतः यानाच्वंगु दयेमाः धकाः धायेधुंकूगु खः ।
अमेरिकी अर्थतन्त्र लिसे धेंधेंबल्लाः याः वयाच्वंगु चीनप्रति ट्रम्प प्रशासनया गुबलें नं बांलाःगु दृष्टिकोण मदु । उकिं हे दकलय् न्हापां चीन लिसे ट्रम्पं व्यापारिक युद्ध सुरु यानाबिल । चीनं अमेरिका दुहां वइगु सामानय् कर अप्वयेकाः सुरु जूगु थ्व व्यापार युद्ध आः स्वंगू खर्ब डलर बराबरया थ्यंवयेधुंकूगु दु । अमेरिकां थौंकन्हय् चीनं आयात जुइगु थ्यंमथ्यं स्वंगू खर्ब डलर बराबरया सामानय् कर अप्वयेकाः चीनयात धरासायी यायेगु कुतः यानाच्वंगु दु ।
थःगु अर्थतन्त्र धरासायी यायेगु कुतः यानाच्वंगु अमेरिकात चीनं नं अथेहे आर्थिक प्रतिबन्ध तयाः कडा लिसः बिया हयेवं ट्रम्प प्रशासन आः घृणाया राजनीति कुहां वःगु खः । ट्रम्पं चीन विरुद्ध न्ह्याकूगु थ्व घृणाया राजनीति गुलि तक न्यना वनी धयागु आः स्वये हे ल्यं दनि । तर ट्रम्पया थज्याःगु घृणाया राजनीतिं विश्व शान्तिइ धाःसा बांलाःगु लिच्वः लाकी मखु ।
LEAVE YOUR COMMENTS