स्वनिगःया संरक्षण देय्या संरक्षण

न्यने दु । येँ महानगरपालिकां उपत्यका विकास प्राधिकरण विघटन तत्काल जुइमाः । सः थ्वयेकूगु दु । शायद थुकिया निंतिं येँ महानगरपालिकां आवश्यक पहल नं न्ह्याकी जुइ । उपत्यका विकासया आधिकारिक निकाय येँ महानगरपालिका खः । देशय् स्थानीय स्वायत्त सरकारया व्यवस्था संविधानं यानातःगु दु ।

स्थानीय सरकारया निर्माण जनतापाखें निर्वाचित प्रतिनिधिपाखें जुइ । थ्व राजनीतिक दृष्टिकोणं अतिकं महत्वपूर्ण जुइ । स्थानीय सरकारं थःथःगु स्थानीय विकासया निंतिं योजना दयेकी । कार्यान्वयन याइ । योजना निर्माण स्थानीय आवश्यकतायात चिउताः तयाः याइ । स्थानीय हित, कल्याण हे स्थानीय सरकारया स्वार्थ जुइ । लक्ष्य जुइ । थौं देय् संघीय संरचनाय् वनेधुंकूगु दु ।

स्थानीय सरकार अझ स्थानीय विकासया निंतिं अप्वः जिम्मेवारी जुइमाःगु दु । सशक्त जुइमाःगु दु । थौं । स्थानीय सरकारया लागा, कर्तव्य, अधिकार बारे संविधानं किटान याइ । याना तइ । स्थानीय सरकार अर्थात स्थानीय निकायया संरचना, कर्तव्य, अधिकार धइगु सुयां कृपा, अनुग्रहया विषय जुइमखु ।

थ्व सुनानं यल कि बीगु मयल कि कायेगु, मनय् लू थें हस्तक्षेप यायेगु ख्यः मखु । जन अनुमोदित संस्था जूगुलिं थुकिया थःगु हे वैधता दु । दइ । स्थानीय सरकार, संस्थायात धुँ कासाय् च्वलेचिया गन्ती थें खंका, संकाच्वनेगु, म्हितकेगु गैर संवैधानिक कुकृत्य जुइ । स्वाभिमानी स्थानीय सरकारं गैर संवैधानिक हस्तक्षेपयात पनी । पनेमाः ।

अन्यथा । स्थानीय सरकारं थःगु स्थानीय निर्माणप्रतिया कर्तव्य पूवंके फइमखु । अःखः व्यवधानया लँय् फसे जुइ । थौं । उपत्यका विकास प्राधिकरणं स्वनिगःया जनताया दथुइ तःधंगु आतंक सृजना यानाच्वंगु दु । जनताया सःयात जबर्जस्त क्यत्यलाः विकास, निर्माणया ख्वाःपाः पुयाः थ्वं मनय् लू थें ज्या याना वयाच्वंगु दु ।

सतक विस्तारया नामय् मनूतय् छेँ बुल्डोजरं थुनाः स्थानीय जनतायात घोर दुःख बिया वयाच्वंगु दु । उकुन्हु छगू ज्याझ्वलय् प्रधानमन्त्रीजुं धाइ । ‘ आः । देशय् चिकुगु कारणं सुं सी माली मखुत । नये मखनाः सुयां मृत्यु जुइ मखुत । सरकारं थुकिया पूर्व व्यवस्था याइ । याये धुंकल ।’ वय्कःया आश्वासनं छखेर जनतायात थःगु दुःख तंकेगु विश्वास बियाच्वंगु दु ।

मेखेर सरकारं हे दयेकूगु प्राधिकरणं जनताया छेँ आकाझाकां थुनाः स्वनिगःया जनतातय्त छेँ विहीन यायेत स्वयाच्वंगु दु । उपत्यका विकास प्राधिकरणया थ्व दादागिरी शायद सम्माननीय प्रधानमन्त्रीजुं मसिउ ला ?! स्थानीय जनतायात शंका जुयाच्वंगु दु । प्रधानमन्त्रीजुं धाथें सिउगु खःसा उपत्यका विकास प्राधिकरणं थुलि निर्मम, क्रुरकथं जनतालिसे खेलवाड याये फइ मखुगु जुइ ! थुकिया प्रमुखं थुकथं जंगली किसिं थें स्थानीय जनतायात आतंकित याये मफइगु जुइ ।

सरकारं हे दयेकूगु प्राधिकरणं जनताया छेँ आकाझाकां थुनाः स्वनिगःया जनतातय्त छेँ विहीन यायेत स्वयाच्वंगु दु । उपत्यका विकास प्राधिकरणया थ्व दादागिरी शायद सम्माननीय प्रधानमन्त्रीजुं मसिउ ला ?! स्थानीय जनतायात शंका जुयाच्वंगु दु ।

थौं आम जनतायात उपत्यका विकास प्राधिकरणयात गुगु गैर सामाजिक, उपत्यका विरोधी माफियातय्सं संचालन यानाच्वंगु दु धइगु विश्वास जुइ । रहस्यपूर्ण अन्धकारं प्यखेरं त्वपुयाच्वंगु दु ।स्वनिगलय् आः अनेक न्हू न्हूगु स्मार्ट सिटी, स्याटेलाइट सिटीत निर्माण जुइत्यंगु खँत वइ । करोडौं जनता उपत्यकाय् हयेगु । भव्य सहरत दयेकेगु ।

आधुनिकीकरणया नामय् मनय् लू थे स्वनिगलय् सहरत दयेकेगु । ममः पसः चायेके थें, स्वनिगलय् सहरत दयेकेगु होडवाजी न्ह्यानाच्वंगु दु । नेतात स्वयम थज्याःगु होडवाजीइ संलग्न जुयाच्वंगु दु । थ्व होडवाजी अन्ततः विकासया नामय् स्वनिगःयात क्षतविक्षत यायेगु षडयन्त्र जक खः । आः । मेलम्चीया लः वयेत स्वदँया ई काइ हँ ! देय्या पर्यावरणया हालत न्हियान्हिथं क्षय जुया वनाच्वंगु दु ।

जनसंख्याया चाप स्वनिगलं बहन याये फइगु स्थिति मदु । गाडीतय् लागि लँ तब्या याना बी माल । गाडी कम्पनीतय् माग दु । लँजुवाःत जेब्रा क्रसय् दुर्घटना जुयाः सी मालाच्वंगु दु । थज्याःगु पूर्वाधारविहीन अवस्थाय् अनेक नवीन सहरत, आधुनिक लँ दयेकाः करोडौं जनता स्वनिगलय् हयेगु कुतः थौं कथित विकास माफियातय्सं यानाच्वंगु दु ।

थ्व स्वनिगः ध्वस्त यायेगु षडयन्त्र खः । थज्याःपिं षडयन्त्रकारीतय् मतियार उपत्यका विकास प्राधिकरणया रहस्यपूर्ण भूमिकाप्रति स्वनिगलं वाः चायेका हयाच्वंगु दु । थ्व स्वनिगःवासीतय् निंतिं उत्साहवद्र्धक खँ जुइ । थौं स्वनिगःवासी, स्वनिगःया सम्पदा, कला, संस्कृति, प्राकृतिक सौन्दर्यतायात म्वाका तयेगु जिम्मा मूलत येँ महानगरपालिका, यल महानगरपालिका, ख्वप नगरपालिकाया ब्वहलय् लाःगु दु ।

थौं स्वनिगःया नगरप्रमुखत तसकं जागरुक, योग्य स्थानीयवासीत खः । वय्कःपिं स्वनिगःया संरक्षण यायेगु ज्याय् चुके जुल धाःसा स्वनिगःया अस्तित्व धरासायी जुइ । थुकी शंका मदु । स्वनिगःया नगरप्रमुखतसें स्वनिगः बचाउ आन्दोलनयात जीवन्त यायेमाः । स्वनिगः नं देय्या अंग खः । स्वनिगःया संरक्षण नं देय्या संरक्षण खः । जुइ ।

सम्बन्धित बुखँ

LEAVE YOUR COMMENTS