रक्षामन्त्रीलिसे सांसदया कचमच
येँ – खोनाय् फास्ट ट्रायक दयेकेगु निंतिं मुआब्जा अप्वयेकेमाः धकाः लबिङ यानाच्वंम्ह नेपाल कम्युनिष्ट पार्टीया सांसद पम्फा भुसाल व वहे पार्टीया रक्षा मन्त्री ईश्वर पोखरेल दथुइ थ्व विषयय् कचमच सुरु जूगु खँ सीदुगु दु ।थःगु क्षेत्रया जनताया समस्यायात कयाः रक्षा मन्त्रीं उलि चिउताः मक्यं धासें सांसद भुसाल असन्तुष्ट जुयाच्वंगु दु ।
मुआब्जा अप्वयेकेमाः धकाः स्थानीय जनता व रक्षा मन्त्री समेत तयाः सहलह यायेगु ज्याय् सांसद भुसालं पहल यानादीगु खः । सहलहया झ्वलय् रक्षा मन्त्री पोखरेलं छुं भचा मुआब्जा अप्वयेकेगु संकेत बियादीगु खः । तर आः वयाः थम्हं बिउगु बचं कथं रक्षा मन्त्रीं मुआब्जा अप्वयेकेगु ज्यायात वेवास्ता याःगुलिं सांसदं भुसालं थःगु अपमान जूगु महसुस यानादीगु खँ नं सूत्रं धाःगु दु ।
थ्वहे झ्वलय् सांसद भुसालं मुआब्जा अप्वयेकेमाःगु खँय् थम्हं प्रधानमन्त्री केपी शर्मा ओलीयात नापलानाः ध्यानाकर्षण यानागु खँ ’नेपालभाषा टाइम्स’ यात कनादीगु दु । वय्कलं धयादिल, ‘रक्षा मन्त्रीं सरोकारवाला स्थानीय जनताया न्ह्यःने च्वनाः झिगू बुँदाया सम्झौता याःगु खः तर आः उगु सम्झौता कथं ज्या मयाः उकिं जिं थ्व विषयय् प्रधानमन्त्रीया ध्यानकर्षण यानागु दु, प्रधानमन्त्रीं जिं स्वये धकाः लिसः बियादीगु दु ।’
वय्कलं फास्ट ट्रायकया खँ मुआब्जा जक मखु धयादिसें स्थानीय जनताया विस्थापनलिसे नं स्वानाच्वंगु दु धयादिल । गुलिखे स्थानीय जनता जग्गा अधिग्रहण याइगु इलय् विस्थापित जुइमाःगु अवस्था वये फइगु खँ कनादिसें वय्कलं थुकथं थातथलों विस्थापित जनतायात पुनस्र्थापित यायेमाःगु खँय् नं बः बियादिल ।
LEAVE YOUR COMMENTS