भोतय् न्हूगु विमानस्थल

येँ – येँया त्रिभुवन अन्तर्राष्ट्रिय विमानस्थलया जाम हटे यायेत सरकारं भोत वा धौख्यलय् मेगु छगू चीधंगु विमानस्थल दयेकेगु तयारी शुरु याःगु दु । थ्व छगू विमानस्थल दयेकल धाःसा त्रिभुवन विमानस्थलया २० प्रतिशत जाम हटे जुइगु खँ धाःगु दु ।

थ्व विमानस्थलय् थौंकन्हय् १५ म्ह यात्रु क्वबीगु ट्विनेटर विमानं २५० म्ह यात्रु क्वबीगु बोइङयात घन्टौं तक आकासय् थाका तइगु जूगुलिं आवंलिं चिग्वःगु जहाज फुक्क अन हे दिकेगु कथं थ्व विमानस्थल दयेकेत्यंगु खः । यदि अन विमानस्थल दयेकीगु जुल धाःसा छुं स्थानीय जनताया छेँ समेत अधिकरण यानाः जंगल नं छुं भचा फँडानी याये मालीगु खँ धाःगु दु ।

विमानस्थल दयेकीगु जुल धाःसा थुकिया व्यवस्थापन समेत याना बी धकाः स्थानीय जनता व अनया उद्योग वाणिज्य ख्यःयापिं मनूतय्सं धयाच्वंगु दु । अन ५ अर्ब तका खर्च यानाः स्वदँया दुने विमानस्थल दयेकेगु सरकारया ग्वसाः दु ।