मन्त्री जुइपिनिगु निंतिं विज्ञापन !

नेपाःया राजनीतिइ हालय् छगू न्हूगु तरंग वल । येँ निर्वाचन क्षेत्र नं ७ पाखें प्रतिनिधिसभा सदस्य रामवीर मानन्धरं पार्टीया नेता वामदेव गौतमयात प्रतिनिधिसभा सदस्य दयेकेगु निंतिं राजीनामा बिउगु घटनां नेपाःया संचारमाध्यम नापं सामाजिक संजालय् तकं तःधंगु हे बहस व चर्चा जुल ।

थ्व चर्चा थुकी हे जक सीमित मजू । रामवीरं राजीनामा बियाः उपचुनावय् वामदेवयात त्याकेगु अले रामवीरयात राष्ट्रियसभाय् यंकाः मन्त्री दयेकेगु व वामदेवयात उपप्रधानमन्त्री दयेकेगु धइगु खँ नं उलि हे चर्चा जुल । मन्त्री जुइत चुनाव हे ल्वानाः त्याकेमाः धइगु मदु जुयाच्वन । विज्ञापनपाखें नं मन्त्री जुइ धइगु जुयाच्वन । तर, उकिया निंतिं धाःसा योग्य जुइमाः ।

छम्ह नवनिर्वाचित प्रधानमन्त्रीं थःगु मन्त्रिमण्डलय् योग्यपिं मन्त्री दुथ्याकेत धासें खुल्ला रुपं हे विज्ञापन याःगु दु । थ्व घटना खः इराकया । नवनिर्वाचित प्रधानमन्त्री अदेल अब्दुल महदीं थःगु मन्त्रिमण्डलय् योग्यपिंत अवसर बीगु धासें सर्वसाधारणया निंतिं खुल्ला विज्ञापन याःगु खः । इराकी प्रम महदीं थःगु मन्त्रिमण्डलय् सर्वसाधारण जनतापाखें योग्यपिं मन्त्री दुथ्याकेगु धासें छगू वेबसाइट लन्च याःगु खः ।

महदी नेतृत्वया सरकारय् दुथ्यायेत कार्यानुभव, सीप, कौशल दुपिं न्ह्याम्हेसिनं नं आवेदन बी फइगु विज्ञापनय् धयातःगु दु । न्हूगु निर्वाचन लिपा प्रधानमन्त्री महदीं वइगु लछिया दुने न्हूगु सरकार गठन यायेमाःगु जुइ । उकिं महदीं नं सर्वसाधारणपाखें योग्यपिं मन्त्रिमण्डलय् दुथ्याकेत सर्वसाधारणयात आवेदन बीत आह्वान याःगु खः ।

इराक युद्ध व आइएसया आतंकवाद विरुद्ध ताःहाकःगु संघर्ष न्ह्याःगु इराक थ्व इलय् शान्तिया लँपुपाखे न्ह्याः वनेगु कुतः जुयाच्वंगु दुसा इराकी जनतां नं न्हूगु सरकारपाखें देय् व जनताया निंतिं छुं न्हूगु व बांलाःगु ज्या जुइगु संकेतया रुपय् कयाच्वंगु दु ।