सोमवाः बसन्तपुलिइ भाषा दिवस ज्याझ्वः
येँ (नेपालभाषा टाइम्स)÷बागमती प्रदेश सरकारं नेपालभाषा व तामाङ भाषायात सरकारी मान्यता बी कथं सोमवाः थ्व सम्बन्धी कानुन कार्यान्वयन याइगु समारोहया लागिं व्यापक तयारी जूगु दु । वइगु सोमवाः सुथय् ७ बजे येँया बसन्तपुलिं ¥याली पिकयाः चाःहिलेगु व लिहां वयाः अन हे सभा यायेत्यंगु दु । ¥यालीइ येँया थीथी बाजं खलः लिसें तामाङ समुदायपाखें नं थीथी बाजं पुचः–तय्सं ब्वति काइगु खँ धाःगु दु ।
वकुन्हु येँय् मू समारोह न्यायेकू थें बागमती प्रदेशया राजधानी हेटौंडाय् नं विशेष ज्याझ्वः यायेत्यंगु दु । लिसें बागमती प्रदेश दुने लाःगु १३ गुलिं हे जिल्लाय् वकुन्हु ज्याझ्वः यायेगु तयारी जुयाच्वंगु दु । थुकिया लागिं नेवाः देय् दबू व तामाङ घेदुङ विशेष रुपं सक्रिय जूगु दु ।
वकुन्हु स्वनिगःया नं थीथी थासय् दिपावली यानाः झःझः धायेकेगु ग्वसाः जुयाच्वंगु दु । ज्याझ्वः बारे प्रचार प्रसार यायेत येँया थीथी थासय् ब्यानर खायेगु ज्या नं जूगु दुसा सामाजिक सञ्जालय् नं थुकिया बारे प्रचार जुयाच्वंगु दु ।
भाषा कानुन कार्यान्वयन जुइगु लसताय् बागमती प्रदेश सरकारपाखें सोमवाः छन्हु सार्वजनिक बिदाया नं घोषणा याःगु दु ।
LEAVE YOUR COMMENTS