डेपुटी गभर्नर श्रेष्ठयात सफाई

येँ – नेपाल राष्ट्र बैंकं निलम्बन याःम्ह राष्ट्र बैंकया डेपुटी गभनर शिवराज श्रेष्ठ पुर्नबहाली जुइगु जूगु दु । अनियमितताया द्वपनय् छानविनय् लाःम्ह श्रेष्ठयात कार्तिक १८ गते निसें निलम्बनय् तयातःगु खः । श्रेष्ठया बारे छानविन यायेत दयेकूगु छानविन समितिं बिउगु प्रतिवेदन कथं बखास्र्त हे यायेमाःगु माक्व कारण खनेमदुगु धासें वय्कःयात मन्त्रिपरिषदं पुर्नबहाली यायेगु निर्णय याःगु खः ।
श्रेष्ठया बारे छानविन यायेत राष्ट्र बैंकया सञ्चालक समितिया दुजः श्रीराम पौड्यालया संयोजकत्वय् स्वम्ह दुजः दुगु समिति गठन याःगु खः । समितिइ दुजः कथं सुवोधकुमार कर्ण व रामजी रेग्मी च्वनादीगु खः ।

मन्त्रिपरिषदया निर्णय बारे जानकारी बीत म्हिगः ग्वसाः ग्वःगु पत्रकार सम्मेलनय् नेपाल सरकारया प्रवक्ता लिसें सञ्चार तथा सूचना प्रविधि मन्त्री गोकुल बास्कोटां श्रेष्ठयात कयाः जूगु छानविनय् छुं हे दोष मलूगु धासें वय्कःयात सफाइ बीगु निर्णय जूगु खँ धयादीगु खः ।
मन्त्रिपरिषदया निर्णय लिपा डेपुटी गभर्नर श्रेष्ठयात पुर्नबहाली जुयाः थःगु ज्या यायेत लँपु चाःगु दु । श्रेष्ठं राष्ट्र बैंकया नियमन विभाग स्वयेगु याना वयाच्वंगु खः । वय्कःयात सम्पत्ति शुद्धिकरण अनुसन्धानय् सरकारयात ग्वाहालि मयाःगु व अनियमित ज्या यानाः आर्थिक लाभ काःगु द्वपं लाःगु खः ।

मेखे श्रेष्ठं धाःसा राष्ट्र बैंकं थःत बिउगु द्वपं प्रति असहमति क्यँसें गुगु द्वपं थःत बिउगु खः उकी थःगु ल्हाः मदुगु दावी याना वयाच्वंगु खः ।
मन्त्रिपरिषदया निर्णय लिपा ‘नेपालभाषा टाइम्स’ लिसे खँ ल्हासें वय्कलं देशय् अझ नं कानुनी राज दनिगु धइगु प्रत्याभूत जूगु प्रतिक्रिया बियादीगु दु । वय्कलं थःत सरकारपाखें पौ मवनि धासें सरकारं पुर्नबहाली जूगु पौ बीधुंकाः इमान्दारितापूर्वक ज्या यायेगु खँ नं धयादीगु दु । वय्कलं धयादी, ‘इमान्दारितापूर्वक कर्तव्य निर्वाह यायेगु झ्वलय् गलत नियत दुपिंसं थीथी कथं द्वपं बीगु स्वभाविक खः । तर अज्याःगु ज्यां थःत झन थःगु कर्तव्य पूवंकेत जिम्मेवार महसुस याकी ।’
सरकारं श्रेष्ठयात पुर्नबहाली यायेवं वय्कःया गभर्नर जुइगु लँपु नं चाःगु दु । राष्ट्र बैंक ऐन कथं गभर्नर जुइगु निंतिं सिफारिस याइगु स्वम्हेसिया नां मध्ये छम्ह डेपुटी गभर्नर जुइ हे माः । वइगु चैतय् राष्ट्र बैंकया गभर्नर डा. चिरञ्जीवी नेपालं पदावधि फुइत्यंगु दु । न्हूम्ह गभर्नर ल्ययेगु निंतिं जुइगु सिफारिसय् वरिष्ठताया ल्याखं श्रेष्ठया नां नं सिफारिस जुइगु सम्भावना दु ।

सम्बन्धित बुखँ

LEAVE YOUR COMMENTS