रुक्मणीयात जरिमैंया

नेपालभाषा टाइम्स

ख्वप – साहित्यकार रुक्मणी श्रेष्ठयात थुगुसीया ‘जरिमैया साखः कुमार लुमन्ति सिरपाः’ लःल्हाःगु दु । नेपाल साहित्य मन्दिर ख्वपया ख्वीखुक्वःगु बुन्हिया झ्वलय् थ्व सिरपाः लःल्हाःगु खः । लिसें सुनिल वज्राचार्ययात ‘कुमार साखः लुमन्ति सिरपाः’, श्री आकाश भैवर नौबाजा भजन खलःयात ‘सुमनकुमार (परदेशी) राज– भण्डारी लुमन्ति सिरपाः नं लःल्हाःगु खः ।

अथेहे ज्याझ्वलय् छत्रराज शाक्य व विजय सागरपिंत हनेज्या नं याःगु दु । साहित्य मन्दिरया नायः तिलकप्रकाश कायस्थया सभापतित्वय् जूगु ज्याझ्वलय् मू पाहां कथं प्रा. प्रेमशान्ति तुलाधर झाःगु खः । ज्याझ्वलय् साहित्य मन्दिरं याना वयाच्वंगु योगदानयात कयाः न्ववानादिसें मूपाहां तुलाधरं धयादिल, ‘छुं नं जातियात स्यायेमाल धाःसा उमिगु भाय् न्हंका बिउ धाइ ।

थ्व धापू कथं स्वयेगु खःसा नेवाःत न्हनावनीगु अवस्थाय् थ्यनेधुंकूगु दु । थज्याःगु इलय् नेपाल साहित्य मन्दिरं नेपालभाषायात म्वाका तयेत, नेवाःतय्गु संरक्षण यायेत ख्वीखुदँ तक मदिक्क यानाच्वंगु योगदान च्वमछासें मगाः ।’ज्याझ्वलय् विराट नेपालभाषा साहित्य सम्मेलन गुथिया नायः कृष्णभक्त बोडे, रामशेखर लुमन्ति दबूया नायः गोविन्द मान श्रेष्ठ, याताजःया नायः सौरभ शाक्यपिं पाहां कथं झाःगु खः ।