‘किशोर–किशोरी मतिना बलात्कार मखु’
ख्वप (नेपालभाषा टाइम्स)- बालविवाह याइपिं किशोर किशोरीयात बलात्कारया मुद्दाय् सजाय बीगु उचित मजुइगु ब्याख्या सर्वोच्च अदालतं याःगु दु । प्रेम सम्बन्ध लिपा नाबालिकायात इहिपा याःम्ह छम्ह किशोर विरुद्ध लाःगु बलात्कार मुद्दाय् सर्वोच्च अदालतं बलात्कारया पलेसा वैवाहिक बलात्कारया सजाय जुइगु फैसला न्यंकूगु खः ।
न्यायाधीशपिं प्रकाशमान सिंह राउत व कुमार रेग्मीया इजलासं किशोर किशोरीया प्रेम, वयां लिपाया इहिपा व बलात्कारया मुद्दा लाःगु अवस्थाय् फुक्कं परिस्थितिया बिचाः यानाः आरोपीयात कठोर सजाय यायेबलय् उद्देश्य पूमवनीगु खँ न्ह्यथंगु दु । वंगु मंगलवाः सर्वोच्च अदालतं सार्वजनिक याःगु फैसलाय् धयातःगु दु, ‘समान उमेर समूह व छुं निश्चित उमेर अन्तरया बालबालिका दथुइ जुइगु प्रेम सम्बन्ध व यौन चाहनाया कारणं शारीरिक सम्पर्क जुइगु अवस्थायात कानुनया यन्त्रवत व्याख्या यानाः बालबालिकायात सजाय बी मजिउ ।’
पाँचथरया चेतन लावती व अन हे च्वंम्ह नाबालिका सेलिना लिम्बु (अदालतं तःगु सांकेतिक नां) लिसे स्वदँ तक मतिना जुल । वयां लिपां उमिसं सल्लाह यानाः २०६६ चैतय् बिसिउँ वनाः लिम्बु संस्कार कथं इहिपा यात । छुं ई मिजंया छेँय् च्वनाः सेलिना थःछेँ वन । म्ह्याय् थःछेँय् वःगु मौकाय् लाकाः अबुम्हेस्यां जिलाजं चेतन विरुद्ध थः नाबालिका म्ह्याय्यात बलात्कार याःगु धासें प्रहरीइ उजुरी बिल । प्रहरीं १४ दँ दुम्ह किशोरीयात बलात्कार याःगु धासें चेतन लावती विरुद्ध बलात्कारया मुद्दा न्ह्याकल ।
वयां लिपा जिल्ला अदालतं चेतन लावतीयात ‘मस्तय् दथुइ मञ्जुरीइ हे इहिपा जूगु धासे’ धासें बलात्कारया द्वपनय् सफाइ बियाः ई मत्यय्कं मिसा मचायात इहिपाः याःगु धासें चेतन लावतीयात १० हजार दां बं पुइकूगु खः । तर पुनरावेदन अदालत इलामं जिल्ला अदालतया फैसलायात उल्टे यानाः थुकी बलात्कार हे ठहर यासें पीडितयात ५० द्वः क्षतिपूर्ति बीगु फैसला याःगु खः । वयां लिपा थ्व मुद्दा सर्वोच्चय् वन । सर्वोच्चं थ्वयात बलात्कार याःगु धायेमछिं धासें हानं पुनरावेदनया फैसलायात उल्टे यानाः थुकथंया फैसला बिउगु खः ।
LEAVE YOUR COMMENTS