अबौद्ध ज्या याःम्ह भिक्षुयात सामाजिक बहिष्कार

येँ – बुद्ध जन्मभूमि लुम्बिनीइ च्वंगु राजकीय बुद्ध विहारय् च्वनाः अबौद्ध ज्या यानाच्वंम्ह छम्ह भिक्षुयात धर्मोदय सभां धार्मिक व सामाजिक बहिष्कार यायेगु निर्णय याःगु दु । सभाया नकतिनि क्वचाःगु साधारणसभां थ्व निर्णय याःगु खँ महासचिव सागरमान वज्राचार्यं ‘नेपालभाषा टाइम्स’ यात कनादिल ।

उगु विहारय् धम्मानुशासक जुयाः च्वनीम्ह भिक्षु सागरधम्मयात अबौद्ध ज्या याना वयाच्वंगु व उकियात कयाः सचेत यानां नं सुधार मजुसेंलिं वय्कःयात धार्मिक व सामाजिक रुपं हे बहिष्कार यायेगु निर्णय सभां याःगु खः । तःदँ न्ह्यः धर्मोदय सभां हे दयेका तःगु उगु विहारय् सभापाखें हे भिक्षुपिं च्वनेगु व्यवस्था नं याना वयाच्वंगु खः ।

थ्वहे झ्वलय् वंगु वि.सं. २०७३ सालंनिसें अन भिक्षु सागरधम्मयात तयेगु व्यवस्था जूगु खः । तर उगु विहारय् वइपिं थीथी स्वदेशी व विदेशी उपासक उपासिकापिंसं तया थकीगु दानया ध्यबापाखे लोभ जुयाः भिक्षु सागरधम्मं विहार छगुलिं हे कब्जाय् कायेत स्वःगु द्वपं धर्मोदय सभां बिउगु दु ।

छुं ई न्ह्यः थाइल्याण्डं वःपिं बौद्ध उपासकपिंसं बिउगु १७ लाख तका दां तकं सागरधम्मं रसिद काटे मयासे दुकयाः थम्हं तुं काःगु खँ सभां धाःगु दु । थज्याःगु खँय् वय्कःयात सचेत याः वइपिं धर्मोदय सभाया दुजःतय्त तकं वय्कलं मनू लगे यानाः ख्याना हयेगु यानाच्वंगु खँ धाःगु दु ।

यक्व धयां नं माने मजुसेंलिं वंगु कार्तिक महिनाय् धर्मोदय सभाया अध्यक्ष प्रा. यज्ञमानपति वज्राचार्य व महासचिव सागरमान वज्राचार्य थःपिं हे लुम्बिनी झाःगु जुयाच्वन । उगु इलय् नं भिक्षु सागरधम्मं निम्हेसितं अपमान यासें दुव्र्यवहार समेत याःगु खँ महासचिव वज्राचार्यं कनादीगु दु । वयां लिपा सागरधम्मयात कारवाही यायेगु लागिं धर्मोदय सभाय् प्रस्ताव दर्ता जूगु खः ।

सागरधम्म भिक्षु महासंघया दुजः नं मखुगु जुयाः वय्कःयात महासंघं नं छुं कारवाही याये मछिंगु खँ धाःगु खः । आः धर्मोदय सभां धार्मिक सामाजिक बहिष्कार यायेगु निर्णय याःगुलिं सागरधम्मलिसे सुनां छुं हे कथंया ज्याखँ मयायेगु व वयात छुं कथं स्वापू नं मतयेगु ज्या न्ह्याना वनीगु खँ महासचिव वज्राचार्यं कनादिल ।

सम्बन्धित बुखँ

LEAVE YOUR COMMENTS