ने. सं. ११४६ सिल्लाथ्व दुतिया -

नेपालं मेलेसियायात ८ विकेटं बुकल

कप्तान पारस खड्काया अविजित ५२ रनया ग्वाहालिं नेपालं मलेसियायात ८ विकेटं बुकूगु दु । क्वालालम्पुरय् जुयाच्वंगु टी-२० वर्ल्डकप क्वालिफायर एसिया रिजनया ग्रुप बी अर्न्तगतया कासाय् नेपालं १०१ रनया लक्ष्य १२.४ ओभरय् पूरा याःगु खः । नेपाःया निंतिं उपकप्टान ज्ञानेन्द्र मल्लं नटआउट २७ रन दयेकूगु खः ।

न्हापांगु ब्याटिङ याःगु मलेसियां १९.३ ओभरय् १०० रट जक दयेकाः अलआउट जूगु दु । नेपाःया निंतिं सन्दीप लामिछानें उत्कृष्ट बलिङ यात । सन्दीपं ४ ओभरय् २० रन बियाः ५ विकेट काःगु खः । अथेहे सोमपाल कामीं ३ व कप्टान पारस खड्कां १ विकेट काःगु खः । मलेसियाया निंतिं सफिक शरिफं दकलय् अप्व ४९या योगदान बिउगु खः ।

थ्व नापं मलेसियाया जुयाच्वंगु धेंधेंबल्लाय् नेपालं निगू कासा त्याकूगु दु ।