ईसेवा बहिष्कार याइपिं अप्वल
येँ – अनलाईन भुक्तानी सेवा कम्पनी ईसेवाया बहिष्कार तच्वया वयेवं ईसेवां छगू वक्तव्य जारी यासें छगू अनलाईन पोर्टलय् ह्याक यानाः समाचार लिकाःगु लिसे थःपिनिगु छुं सम्बन्ध मदुगु स्पष्टकरण बिउगु दु ।
अनलाइन न्यूज पोर्टल ‘काठमाडौं प्रेस’य् पिहां वःगु छगू समाचारयात बिहिवाः ह्याक यानाः डिलेट यानाबिउगु खः । थ्व समाचार ह्याक यानाः चिकेगुलीइ प्रधानमन्त्रीया प्रविधि सल्लाहकार जुयाच्वंम्ह अजगर अलीया कम्पनी सिरान टेक्नोलोजीं याःगु खः । अजगर अली ईसेवाया संस्थापक नं खः ।
समाचार पोर्टलयात ह्याक यानाः समाचार हे चिइकेफुम्ह कम्पनीया मालिकं चले यानाच्वंगु ईसेवां थः ग्राहकतय् नं ध्यबा खुया कायेफु धासें ईसेवायात बहिष्कार यायेगु अभियान न्ह्यानाच्वंगु खः ।
नांजाःम्ह कार्टुनिष्ट रविन साय्मिं सामाजिक सञ्जालय् पोस्ट याःगु दु, ‘सिस्टमय् हे दुहां वनाः समाचार लिकायेफुम्हेसिनं ग्राहकया ध्यबा उखेथुखे मयाइ ला ? थनिंनिसें ईसेवायात बाई बाई ।’ वय्कःया थ्व पोस्टयात यक्वसिनं सहमित प्वंकाः थःपिंसं नं ईसेवा चिकेगु खँ धाःगु दु । थुकियात समर्थन यासें विपुल नेम्बांगं ग्राहकतय् एकाउन्ट छम्वह छम्वह दां जक खुयाकाःसां यक्व ध्यबा खुयाकाइ, ग्राहकतय्सं ला वाः हे चाइमखु धाःगु दु ।
अथेहे मेम्ह फेसबुक प्रयोगकर्ता आरजे श्रेष्ठं थःम्हं इसेवाया एकाउन्ट डिलेट यायेत ईसेवालिसे म्यासेन्जरय् खँल्हानागु ‘स्क्रिन सट’ हे फेसबुकय् शेयर यानादीगु दु ।
केशव भट्ट नांया फेसबुक प्रयोगकर्ता च्वःगु दु, ‘थुकिया सिइओं हे साइबर कानुनया अवहेलना याय, तर सरकारं वया विरुद्ध छुं कारवाही याइमखु । थ्व स्वयां गलत मेगु छु दइ ।’
ग्राहकतय्सं धमाधम ईसेवा चिइका हयेवं कम्पनीं शुक्रवाः छगू वक्तव्य जारी यासें थःपिंसं समाचार पोर्टलया समाचार चिइकूगु धकाः वयाच्वंगु सम्बन्धय् थःपिनिगु छुं नं स्वापू मदुगु खँ धाःगु दु ।
LEAVE YOUR COMMENTS