अमेरिकाय् वाइडेन वइगु जुइवं लुँया भाः नं कुहां वल

येँ (नेपालभाषा टाइम्स) – अन्तर्राष्ट्रिय बजारय् लुँया भाः हाकनं कुहां वःगु दु। अन्तर्राष्ट्रिय बजारय् लुँया भाः कुहां वयेवं उकिया लिच्वः नेपाःया बजारय् नं लाःगु दु। म्हिगः लुँ प्रतितोलां ७०० तका कुहां वःगु खः । वंगु शुक्रवाः ९२ हजार ५०० तकां कारोबार जूगु खःसा म्हिगः ९१ हजार ८०० तका कायम जूगु खः ।

अन्तर्राष्ट्रिय बजारय् डलर मजबुत जूगुलिं लुँया भाः कुहां वःगु खँ नेपाल सुनचाँदी व्यवसायी महासंघया पुलांम्ह अध्यक्ष तेजरत्न शाक्यं कनादीगु दु। वय्कःया कथं अमेरिकी राष्ट्रपति निर्वाचित जूम्ह जो वाइडेनया सपथ ग्रहण न्ह्यःने वःगुलिं नं डलर मजबुत जुयाः लुँया भाः कुहां वःगु खँ कनादिल ।

वाइडेनं अमेरिकाय् ब्वलनाच्वंगु समस्या समाधान याइ धइगु विश्वास यानाच्वंगुलिं यानाः नं लुँइ लगानी याइपिं आः वयाः लुँ मीत वयाच्वंगुलिं भाः कुहां वःगु खः । म्हिगः अन्तर्राष्ट्रिय बजारय् प्रतिऔंस लुँ १८३० डलर कायम जूगु खः । उगु भाः कुहां वयाः १८०० डलर तक कायम जुइगु विश्लेषण जुयाच्वंगु दु। उकथं हे म्हिगः वहःया भाः नं ३० तका कुहां वःगु दु। वंगु शुक्रवाः तक १२६० तका कायम जुयाच्वंगु खःसा म्हिगः १२३० तका कायम जूगु खः ।

सम्बन्धित बुखँ

LEAVE YOUR COMMENTS