स्थानीय तहयात भवन निर्माण मापदण्ड लागू यायेत निर्देशन

येँ – सरकारं स्थानीय तहयात भवन निर्माण मापदण्ड लागू यायेत निर्देशन बिउगु दु । संघीय मामिला तथा सामान्य प्रशासन मन्त्रालयं देय्या दक्वं स्थानीय तहयात वस्ती विकास, शहरी योजना तथा भवन निर्माणसम्बन्धी आधारभूत निर्माण मापदण्ड–२०७२ लागू यायेत निर्देशन बिउगु खः ।

मन्त्रालयं कमजोर मापदण्डय् च्वनाः भवन निर्माण यायेगु ज्या जुयाच्वंगु धासें दक्वं देय्न्यंकंया दक्वं स्थानीय तहयात उगु मापदण्ड कार्यान्वयनय् हयेत निर्देशन बिउगु खः । मन्त्रालयया छम्ह शाखा अधिकृत विष्णु श्रेष्ठं मापदण्ड मेमेगु स्वयां नं सशक्त जूगुलिं दक्वं स्थानीय तहयात उगु मापदण्ड कार्यान्वयनय् हयेत निर्देशन बिउगु धयादीगु दु ।

मापदण्डय् भवन निर्माणया अवस्था, भवनया जाः, सतकया ब्या, खुसि व पुखूया सेटब्याक, जग्गा खण्डीकरण लगायतया विषय दुथ्याना च्वंगु दु । अथे हे भवनया ढाँचा, नक्सा, पूर्वाधार व विशेष सुविधाया डिजाइन, आर्किटेक्ट वा इन्जिनियरपाखें निर्माण सुपरीवेक्षण याकेमाःगु व सुपरीवेक्षण याःगु धकाः प्राविधिकं सिफारिस याःगु भवनयात जक स्थानीय तहं थःपिनि प्राविधिकपाखें नं जाँचपास याकाः निर्माण सम्पन्न जूगु प्रमाणपत्र बीमाःगु मापदण्डय् न्ह्यथनातःगु दु ।

थुकथं हे मापदण्डय् स्थानीय तहं हःगु ‘छखा छेँ, छमा सिमा’, ‘छगू गां, छगू वन’, ‘छगू नगर, तःगू उद्यान’ अभियान संचालन यायेमाःगु, सार्वजनिक खुल्ला क्षेत्रया पहिचान यानाः उकियात खुल्ला क्षेत्र घोषणा यायेगु व उगु थाय्यात हरियाली उद्यानया रुपय् रुपान्तरण यायेमाःगु, जोखिमयुक्त क्षेत्रय् भवन निर्माणय् प्रतिबन्ध तयेगु थेंज्याःगु खँ नं दुथ्याकातःगु दु ।