येँय् नेवाः सांस्कृतिक छेँ दनीगु
येँ महानगरपालिकाया नीति तथा कार्यक्रम
येँ – येँ महानगरपालिकां येँय् नेवाःतय्गु सम्पूर्ण कला संस्कृति पिब्वइगु ‘नेवाः सांस्कृतिक भवन’ दयेकीगु जूगु दु । म्हिगः येँ मनपाया मेयर विद्यासुन्दर शाक्यं नगरसभाया न्याक्वःगु अधिवेशनय् पेश यानादीगु मनपाया नीति तथा कार्यक्रमय् थ्व खँ न्ह्यथनातःगु खः । लिसें थ्व दँनिसें नेपालभाषां साहित्य सिर्जना यानाच्वंपिं येँया साहित्यकारयात ‘महानगर साहित्य सिरपाः’ बीगु नं घोषणा याःगु दु ।
मनपां थगुने थीथी सञ्चार माध्यमय् ज्या याइपिं झिम्ह पत्रकारतय्त म्हतिं ५० द्वः तकाया सिरपाः बिउगु खःसा थ्व व्यवस्था आः नं कायम हे जुइगु खँ धाःगु दु । उकी आः साहित्य सिरपाः नं थपे याःगु खः । येँ देय्या भाय् नेपालभाषाया साहित्यया श्रीवृद्धि यायेगु लागिं थ्व सिरपाः बीगु व्यवस्था यायेत्यंगु खः ।
थुकिया नापं कम्युनिष्ट पार्टीया मदुम्ह नेता मनमोहन अधिकारीया नामं ज्येष्ठ नागरिक सिरपाः व मदुम्ह कांग्रेस नेता गणेशमान सिंहया नामं प्रजातन्त्र सेनानी सिरपाः बीगु नं घोषणा याःगु दु ।अथे हे येँ देय् बारे अनुसन्धान याइपिं स्वदेशी वा विदेशी अन्वेषकतय्त शोधवृत्ति प्रदान यायेगु व्यवस्था नं नीति तथा कार्यक्रमय् यानातःगु दु ।
येँेदेया सामुदायिक विद्यालयतय्त बांलाका यंकेगु लागिं उत्कृष्ट विद्यार्थीतय्त सिरपाः बीगु व्यवस्था नं याःगु दु ।आः येँ देय्यात यचुपिचु यायेगु लागिं मास्क हे तयेम्वाःगु ‘नो माक्स सिटी’ या रुपय् विकास याना यंकेगु लक्ष्य नं मनपां तःगु दु । उकिया लागिं यचुपिचुयात विशेष प्राथमिकता बियाः न्ह्याकेगु ज्याझ्वः हःगु दु ।
मनपा दुने लाःगु पर्ती जग्गातय्त आः मनपा अन्तर्गत हयाः अन योगा केन्द्र, मस्त म्हितेगु पार्क दयेका वनेगु नं लक्ष्य तःगु दु । थौंकन्हय् मनपाया फुक्कं वडां थःथःगु वडा दुने लाःगु पर्ती जग्गाया लगत कायेगु यानाच्वंगु दु । आः येँय् साइकलयात महत्व बीगु लागिं साइकल लेन दयेकेगु, विद्युतीय गाडीयात प्राथमिकता बीगु व छुं छुं थासय् गाडी निषेध यानाः वातावरण बांलाकेगु ताः नं तःगु दु ।
अथे हे नगरयात स्मार्ट सिटी दयेका यंकेगु लागिं आः नगरवासीयात स्मार्ट सुविधा बीगु व मनपाया अर्थतन्त्रयात नं स्मार्ट दयेका यंकेगु लक्ष्य तःगु दु । उकिया लागिं आः मनपां कायेगु यानाच्वंगु थीथी कथंया कर, जरिवाना आदि इन्टरनेटं पुले फइगु व्यवस्था यायेत्यंगु दु । अथे हे मनपा दुने लाःगु सहकारीतय्त आः अनलाइन दर्ता यानाः अनलाइन हे निगरानी याये फइगु प्रणाली विकास याइगु जूगु दु ।
सुयां नं यदि निखा छेँयात छखा हे यानाः दनीगु जुल धाःसा उमित करय् छुट बीगु व्यवस्था नं हःगु दु । नापं मनपाया थःगु हे टेलिभिजन कथं ‘मेट्रो टिभी’ सञ्चालन यायेगु योजना नं न्ह्यःने हःगु दु ।
LEAVE YOUR COMMENTS