गुकथं वल आइसक्रिम ?

आइसक्रिम । बर्खा जुइमा वा चिकुला, न्ह्यागु मौसमय् नं मचांनिसें ज्याथजिथिपिंत उलि हे यःगु छताजि नसाज्वलं खः । इहिपा, कय्तापुजा, बाः¥हाः वा मेमेगु लसता भ्वजय् नं मदयेक मगाःगु छताजि खाद्य पदार्थ जुइधुंकूगु दु । गनं चाःहिलेत वन धाःसा न्ह्याम्हेसितं आइसक्रिम नये मास्ति वइ । नया न च्वंगु दु ।

तर थ्व संसार आइसक्रिमया उत्पादन गुकथं जुल धइगु खँय् यक्वसिनं ध्यान बियाच्वंगु मदयेफु । थौं स्वयां निद्वः दँ न्ह्यः हे थ्व संसारय् आइसक्रिम नयेगु चलन वयेधुंकूगु खः । खय्तला बरफ धिचिंकेत माःगु मेसिन वा रेफ्रिजेरेटर वःगु यक्व मदुनि । अथे खःसां आइसक्रिमया दयेकेगु व नयेगु चलन धाःसा निद्वः दँ न्ह्यः हे वयेधुंकूगु खः ।

अथे खःसा थ्व गुकथं सम्भव जुल ? धइगु न्ह्यसः दनेफु । थ्व स्वाभाविक नं खः । प्राचीनकालय् हे मनुखं आइसक्रिम उत्पादन यानाः प्रचलनय् हःगु खः । अबलय् आः थें ततजाःगु छेँ मदु । अले दक्वं थें छेँया पौ भ्यसें लू । थथे भ्यसें लूगु छेँय् आइसक्रिम दयेकीगु खः । अले उगु इलय् अप्वःथें छेँया छेँदि भूमिगत जुयाच्वनीगु खः । गुगु तसकं तजाः जुइक दयेका तइगु खः ।

अज्याःगु हे थासय् दयेकातःगु तख्ताय् लः धिचिंकेत अर्थात बरफ दयेकेत प्रयोग याइगु खः । थज्याःगु तजाःगु भूमिगत थासय् निभालं मखइगु जक मखसे तसकं ख्वाउँसे नं च्वनाच्वनीगु खः । अझ थज्याःगु थासय् दछितक हे च्वापु धिचिंका तकं तये फइगु खः । थुकथं च्वापु धिचिंकाः नयेगु याना वयाच्वंगु बरफ हे थौंया आधुनिक इलय् थीथी सवाःया आइसक्रिमया रुप काःगु खः ।