सामानं भाइरस सरे जुइ ला ?

येँ – कोरोना भाइरसया कारणं बन्द जुयाच्वंगु तातोपानी व रसुवागढीया चिनियाँ नाका आः तकं मचाःगु कारणं नेपाःया छुं तःधंगु निर्माण ज्या समेत प्रभावित जूगु खँ व्यवसायीतय्सं धाःगु दु । लिसें चीनं नेपाः सामान हयेगु ज्या नं ठप्प जूगु कारणं नेपाःया बजारय् चिनियाँ सामान नं धमाधम न्यायेगु मदया वनाच्वंगु खँ नं धाःगु दु ।

चीनं विशेष यानाः वसःतासः व विद्युतीय ज्वलंत थ्वहे रसुवागढी व तातोपानी नाका जुयाः दुहां वइगु खः ।  चीनय् कोरोना भाइरसया संक्रमण न्यना वनेवं चीनं हे झिंन्यान्हुया लागिं धकाः वंगु माघ १५ गतेनिसें थ्व निगुलिं बन्द याःगु खः । तर नाका बन्द याःगु थौं लछि दयेधुंकलं नं थ्व नाका गबले चाली धइगु खँ निश्चित मजूनि ।

सूत्रतय्सं धाःकथं चिनियाँ नाका जुयाः नेपाः वइपिं मनूतय्त नाकाय् तुं कोरोना जाँच यायेगु क्वारेन्टाइनया व्यवस्था मजूतले चीनं नाका चायेकीगु सम्भावना मदु । थज्याःगु छुं ज्या मजूगु कारणं चीनं मेगु छवाः नाका चायेके मतेनि धकाः इनाप याना हःगु दु । थ्व निगुलिं नाकाय् क्वारेन्टाइन तयेगु लागिं नेपाः सरकारं ४० लाख तका बजेट निकासा याःसां जनशक्ति मदुगु कारणं ज्या धाःसा न्ह्याके मफयाच्वंगु खँ धाःगु दु ।

थ्वहे झ्वलय् चीनं वइपिं मनूतय्त नाकाय् परीक्षण यानाः जक दुकायेगु व्यवस्था याःसां चीनं वइगु सामानया बारे छु यायेगु धइगु अन्यौल धाःसा ब्वलंगु दु । चीनं वइगु माल सामानपाखें कोरोना भाइरस सरे जुइ लाकि जुइ मखु धइगु खँ धाये मफयाः सामान आयात यायेगु बारे धाःसा आः तक छुं धाये मफयाच्वंगु खँ अनया नेपाली भन्सारय् ज्या याइपिं कर्मचारीतय्सं धाःगु दु । आयात याइगु माल सामानपाखें भाइरस सरे जुइ लाकि जुइ मखु धकाः नेपाःपाखें चीनया विज्ञतय्त न्ह्यसः न्यना छ्वःगु दुसां उकिया लिसः धाःसा बिया महःनिगु खँ धाःगु दु ।

कोरिया वनीपिंत पन

इपिएस परीक्षा बियाः उत्तिर्ण जुसें दक्षिण कोरिया वनेत ठिक्क जुयाच्वंपिं ५० नेपाःमि आः तुरुन्त ब्वये मफइगु खँ धाःगु दु । चीन धुंकाः कोरियाय् नं कोरोना भाइरस ब्वलना वयेवं अन ज्या याः वनीपिं नेपाःमितय्त आः मछ्वयेगु निर्णय सरकारं याःगु खः । थ्वहे वइगु फागुन १८ गते कुन्हु ५० म्ह नेपाःमितय् छगू पुचः कोरिया वने माःगु खः । तर कोरियाय् कोरोना भाइरस धमाधम तच्वया वंगु व अन च्वनाच्वंपिं नेपाःमितय्त हे उद्धार यानाः नेपाः हये मालीगु खः लाकि धइगु चिउताः ब्वलनाच्वंगु इलय् मेपिं नेपाःमितय्त उखे छ्वयेगु पाय्छि मजुइगु निर्णय नं सरकारं याःगु दु । अथे हे अप्वः नेपाःमित ज्या यानाच्वंगु खाडी मुलुकया सवालय् नं आः बिचाः यायेमाःगु खँ धाःगु दु । खाडीया इरानय् कोरोना संक्रमित लुइधुंकूगु दु ।

सम्बन्धित बुखँ

LEAVE YOUR COMMENTS