अंश मुद्दाय् मांम्हलिसे डीएनए परीक्षण अप्वल

मिसातय्त नं अंश बीमाःगु व्यवस्थालिसें लिपांगु इलय् मिसातय्गु नामय् सम्पत्ति दइगु क्रम नं अप्वया वःगु दु । मिसातय्गु नामय् सम्पत्ति अप्वया वयेवं डिएनएया परीक्षण यायेगु क्रम नं अप्वःगु दु । मिसातय्गु नामय् सम्पत्ति दइगु क्रम अप्वयेवं मां व वया सन्तानया सम्बन्धयात कयाः डीएनए परीक्षणया निंतिं प्रयोगशालाय् वयेगु क्रम नं अप्वःगु खः ।

विशेष यानाः मांलिसे अंश दावी यासें अदालतय् मुद्दा तयेगु याना वयाच्वंगुलिइ आः वयाः जैविक प्रमाणिकरणया निंतिं अज्याःगु मुद्दाय् डीएनए परीक्षणया निंतिं प्रयोगशालाय् वयेगु क्रम अप्वःगु यलया खुमलटारय् च्वंगु राष्ट्रिय विधि विज्ञान प्रयोगशालां न्ह्यथंगु दु । न्हापा जूसां मिजंतय् नामय् जक जग्गा दयाच्वनीगु व थथे जुइबलय् अबु व वया सन्तानया डीएनए परीक्षणया घटनाय् जक परीक्षणया निंतिं वयेगु यानाच्वंगुलिइ आः वयाः मिसातय्गु नामय् नं सम्पत्ति दइगु क्रम अप्वया वनेवं मां व वया सन्तान दथुइ अंश मुद्दा अदालतय् लाइगु अवस्थाय् डीएनए परीक्षण यायेगु क्रम अप्वया वनाच्वंगु प्रयोगशालाया कार्यकारी निर्देशक जीवनप्रसाद रिजालं कनादी ।

‘गुलिखे मिसातय्सं थः सन्तान मखु धकाः अंश बीत माने मजुइवं अज्याःगु मुद्दा अदालतय् थ्यनेगु यानाच्वंगु दु’, वय्कलं न्ह्यःने धयादी, ‘अदालतं डीएनए परीक्षण प्रतिवेदन माग याःगु खण्डय् परीक्षणया निंतिं प्रयोगशालाय् वयेगु यानाच्वंगु दु ।’ सन्तान व इमि मांया दथुइ डीएनए परीक्षण यायेबलय् लिच्वःकथं मां खः धइगु प्रमाणित जूपिं व मजूपिं निगुलिं कथंया लिच्वः खने दयाच्वंगु कार्यकारी निर्देशक रिजालं धयादिल ।

थःत जन्म बिउम्ह मांलिसें सन्तानं अंश माग याइगु इलय् व मामं बीत इच्छा मयाइगु इलय् अज्याःगु मुद्दा अदालत जुयाः प्रयोगशालाय् परीक्षण तकया निंतिं थ्यनीगु खः । गुलिखे घटनाय् परीक्षणपाखे मां खः धइगु प्रमाणित मजूगु घटनां सकसितं अजू चायेका बीगु तकं यानाच्वंगु दु । कार्यकारी निर्देशक रिजालं धयादी, ‘माम्हं थम्हं बुइकाम्ह सन्तान मखु धइगु सिउसां नं सन्तानयात मामं उगु इलय् तक कनामतःगु घटनात दयाच्वनीगु जुयाच्वन ।’

मांअबुं सुनानं मचा बुइकेवं उम्ह मचा संरक्षण याइगुलिं सन्तानं जक मखसे जःलाखःला व वया थःथिति सकसिनं उम्ह मिसा हे मचाया मां खः धइगु भ्रम जुइगु यानाच्वंगु दु । वय्कलं धयादी, ‘मामं थम्हं जन्म बियागु मखु धासें सम्पत्ति बीत माने मजुल धाःसा मां व सन्तानया डीएनए परीक्षणया निंतिं अदालतं आदेश बीगु याइ ।’

अस्पताल लगायतया थासय् जन्म जुयाः व मचायेकं मस्त हिलाबुला जूगु घटनाय् मां व वया सन्तानया डीएनए परीक्षणया लिच्वः नकारात्मक वयेगु यानाच्वंगु प्रयोगशालां न्ह्यथंगु दु । थज्याःगु अवस्थाय् सन्तान धाःसा मुक्कं थःगु जीवनय् थःत जन्म बिउम्ह मां व हे खः धइगु भ्रमय् लानाच्वंगु दइ । कार्यकारी निर्देशक रिजालं न्ह्यःने धयादी, ‘मचा बुइ सातकि हयाः व मचाबू ब्यंकेगु व जा नकेगु नं थम्हं हे याःसां जैविक मां मजुइवं प्रयोगशालाया लिच्वः नं नकारात्मक हे वयेगु यानाच्वंगु दु ।’

प्रयोगशालाय् मानव डीएनए परीक्षणया निंतिं दकलय् अप्वः अदालतया अंश मुद्दालिसे सम्बन्धित वयाच्वंगु दु । अप्वःथें परिवारय् मांया नामय् स्वयां अबुया नमय् सम्पत्ति दयाच्वनी । अप्वःथें अंश मुद्दाय् नं सन्तानं अबुयात हे विपक्षी दयेकाः मुद्दा तयेगु याः । थज्याःगुलिइ नं अबु व सन्तानया डीएनए परीक्षण जुइ । कानुनी व सामाजिक हिउपाःया कारणं मिसातय् नामय् नं सम्पत्ति तयेगु व इमि नामय् नं सम्पत्ति दइगु क्रम अप्वया वनाच्वंगु दु । अबु मदयेधुंकूगु परिवारय् व गुलिखे परिवारय् अबु दुसां नं मांया नामय् सम्पत्ति दयाच्वीगुलिं सन्तानं मांलिसें कानुनी रुपं समपत्ति माग यायेगु यानाच्वंगु वय्कलं धयादी ।

कार्यकारी निर्देशक रिजालं धयादी, ‘मिसातय्गु नामय् सम्पत्ति तयेगु क्रम अप्वया वंलिसे मां व सन्तान दथुइ डीएनए परीक्षणया निंतिं प्रयोगशालाय् मुद्दा वयेगु याःगु खः ।’ मुक्कं जिन्दगीइ थम्हं जन्म मबिउम्ह सन्तानयात थःम्हं बुइकूगु हे सुसाःकुसाः यानाः ब्वलंकूम्ह मामं सन्तानं नुगलय् स्याकीबलय् वा सन्तानलिसे असमझदारी जुइबलय् अंश बीत माने मजुइगुलिं मुद्दा अदालतय्तक थ्यनीगु खँय् बः बियादिसें वय्कलं धयादिल, ‘मुक्कं जिन्दगीइ थम्हं हे बुइकागु खः धकाः झंगः लाःसां छुं खँय् नुगलय् स्यातकि मामं मखु धकाः धायेगु याः ।’

प्रयोगशालां छुं दँ न्ह्यःनिसें विदेशय् च्वनाच्वंपिं अभिभावकया सन्तान विदेश यंकेगु प्रयोजनया निंतिं तकं डीएनए परीक्षण याना वयाच्वंगु निर्देशक रिजालं कनादिल । प्रयोगशालां विश्वव्यापी मान्यता प्राप्त प्रचलित उपकरण, रसायन व किटया प्रयोग यानाः जैविक नताना प्रमाणित यायेगु याना वयाच्वंगु दु । प्रयोगशालाय् मांअबु व कायम्ह्याय् कका–काय्चा, दाजुकिजा, बाज्या व छय्या दथुइ जैविक नाता प्रमाणित यायेगु ज्या जुया वयाच्वंगु दु । हिया नमूनापाखें जक मखसे लाः, ला, सँ, विर्यया दाग, वा आदिपाखें नं डीएनए परीक्षण यायेगु यानाच्वंगु दु ।