सम्पदा क्षेत्रय् राजनीति मयायेत इनाप

येँ(नेपालभाषा टाइम्स)- येँ क्षेत्र नं. ८ या प्रतिनिधिसभा सदस्य विराजभक्त श्रेष्ठं सम्पदा क्षेत्रयात कयाः गुगुं कथंया नं राजनीति मयायेत इनाप यानादीगु दु । संघीय सांसद श्रेष्ठं सम्पदा क्षेत्रय् राजनीति याये मजिउ धासें सम्पदा क्षेत्रयात कयाः गुगुंकथंया राजनीति मयायेत नं इनाप यानादीगु दु ।

हनुमानढोका दरवार संग्रहालय विकास समितिं ग्वसाः ग्वःगु वरिष्ठ कलाकार हरिप्रसाद शर्माया चित्रकला ब्वज्या व ‘हनुमानढोका स्मारिक’ पितब्वज्या ज्याझ्वलय् नवासें सांसद श्रेष्ठं उगु खँ धयादीगु खः ।

ज्याझ्वलय् नवासें वय्कलं थःगु दलं नं सम्पदायात कयाः राजनीति मयायेगु स्पष्ट यासें मेमेगु दलयात नं थ्व खँय् ध्यान बीत इनाप यानादिल । लिसें वय्कलं थ्व स्वयां न्ह्यःया जनप्रतिनिधिं राजनीति याःगुलिं हे गुलिखे सम्पदाय् पुरातत्व विभागयात तकं दुहां वनेगुपाखें निषेध यायेगु ज्या जूगु खँ धयादिल ।

हरेक पटक हनुमानध्वाखाय् वयेबलय् छुं न्हूगु खँ लुया वइगु, न्हूगु हे खँ न्यने दइगु व न्हूगु हे खँ सीके खनीगु धासें सम्पदा क्षेत्रय् कियातःगु कला, सम्पदां बाह्य व आन्तरिक पर्यटकयात आकर्षित यानाच्वंगु दइ धयादिल ।

न्हापाया जनप्रतिनिधितय्सं थें सम्पदा क्षेत्रय् राजनीति मयायेत इनाप यासें वय्कलं देय्न्यंकंया सम्पदा संरक्षणया क्षेत्रय् येँ क्षेत्र नं ८ य् च्वछायेबह जुइकथं ज्या यायेगु प्रतिवद्धता नं प्वंकादिल ।

ज्याझ्वलय् बागमति प्रदेश सांसद शैलेन्द्रमान वज्राचार्यं वरिष्ठ कलाकार शर्मां चित्रकलाया माध्यमं कला, संस्कृति, सम्पदा संरक्षण यानादीगु उकिं हनुमानध्वाखा लाय्कू लागायात विश्वया न्ह्यःने म्हसीकेत योगदान बीगु विश्वास प्वंकादिल ।

संस्कृति, पर्यटन तथा नागरिक मन्त्रालयया सचिव भरतमणि सुवेदीं यल व ख्वपया तुलनाय् येँया सम्पदा पुनःनिर्माणय् ढिलासुस्ती जुयाच्वंगु स्वीकार यासें पुनःनिर्माणयात तीव्रता बीगु प्रतिवद्धता प्वंकादिल ।

पुरातत्व विभागया महानिर्देशक सौभाग्य प्रधानाङ्गं हनुमान्ध्वाखा लाय्कू लागाय् थौंकन्हय् नीनिगू सम्पदा पुनःनिर्माणया चरणय् दुगु व छुं सम्पदात याकनं हे पुनःनिर्माण शुरु यायेगु चरणय् दुगु जानकारी बियादिल ।