चुनावयात १७ न्हु जक प्रचार
येँ (नेपालभाषा टाइम्स)÷आः वइगु मंसिर ४ गते जुइगु आम चुनावय् उम्मेदवारतय्सं मुक्कं १७ न्हु जक प्रचार याये दइगु जूगु दु । निर्वाचन आयोगं पिकाःगु नियम कथं उम्मेदवारतय्त प्रचारया लागिं मुक्कं १७ न्हुया जक ई दइ ।
निर्वाचन आयोगं पिकाःगु तालिकाकथं उम्मेदवारतय्सं मतदान जुइ स्वयां झिंगुन्हु न्ह्यवंनिसें जक प्रचारात्मक कोणसभा व आमसभा याये दइ । मतदानया निन्हु न्ह्यः मौन अवधि शुरु जुइ । अबलय् प्रचार याये दइ मखु । थुकथं उम्मेदवारतय्सं मुक्कं १७ न्हु जक प्रचार याये खनी ।
निर्वाचन आयोगया आयुक्त रामप्रसाद भण्डारीया कथं थ्व नियमया उल्लंघन यात धाःसा उम्मेदवारया मनोनयन तकं खारेज याये फइगु व्यवस्था दु ।
थ्व नियम कथं उम्मेदवारतय्सं आः वइगु कार्तिक १८ गते लिपा जक प्रचार प्रसार याये खनी । आयोगं राजनीतिक दलया प्रतिनिधितय्गु सहमति कयाः हे थ्व तालिका दयेकागु खँ नं आयुक्त भण्डारीं कनादीगु दु ।
उकथं हे उम्मेदवारत ‘घरदैलो’ वनीबलय् नं यक्व मनू ज्वना वने मदइगु खँ धाःगु दु । घरदैलो ज्याझ्वलय् वनेबलय् २५ म्ह जक मनू ज्वना वने दइगु व्यवस्था याःगु दु । घरदैलो ज्याझ्वलय् तसकं तामझाम यानाः वनाच्वंगु उजुरी वःगुलिं आयोगं थ्व व्यवस्था याःगु खः ।
उकथं हे वय्कलं प्रचार प्रसारया झ्वलय् आचार संहिता उल्लंघन जूगु खने दत धाःसा कठोर कारबाही यायेगु ख्याच्वः नं आयोगं बिउगु दु । अज्याःगु अवस्थाय् आयोगं मनोनयन खारेज यायेगु तकया कारवाही याये फइगु खँ धाःगु दु ।
थ्वहे झ्वलय् निर्वाचन आयोगं निर्वाचन आचार संहिता उल्लंघन याइपिंत तत्काल कारबाही यायेत प्रमुख जिल्ला अधिकारीतय्त निर्देशन बिउगु दु । मुख्य निर्वाचन अधिकृतत व्यस्त जूगु अवस्थाय् निर्वाचन अधिकृतया क्षेत्राधिकार प्रमुख जिल्ला अधिकारीं छ्यले फइगु व्यवस्था दु ।
निर्वाचन आयोगं सार्वजनिक याःगु थ्व नियमयात राजनीतिक पार्टीतय्सं धाःसा आपत्ति प्वंकूगु दु । सत्तारुढ दल नेपाली कांग्रेसं हे निर्वाचन आयोगं जारी याःगु आचार संहिताया गुलिखे बुँदा यथार्थपरक व व्यावहारिक मजूगु खँ धाःगु दु । कांग्रेसया प्रवक्ता प्रकाशशरण महतं म्हिगः पार्टी ज्याकुथिइ पत्रकार सम्मेलन यासें उगु खँ धयादीगु खः ।
वय्कलं कांग्रेस व सत्ता गठबन्धन दल आचार संहिताया अधिकतम हद तक कार्यान्वयन यायेगु पक्षय् दु धासें धयादिल, ‘जिपिं चुनावय् कुहां वनेधुनागु दु, उम्मेदवारी बीगु ज्या क्वचायेधुंकूगु दु, तर थुगुसीया निर्वाचनय् निर्वाचन आयोगं आपालं खँय् बन्देज तःगु दु । अथे जूसां जिमिसं फयांफछि सीमा दुने हे च्वनाः प्रचार अभियानयात न्ह्याकेगु कुतः यायेगु जुइ ।’
LEAVE YOUR COMMENTS