डोलेश्वर महाद्यःयाथाय् मेला क्वचाल

ख्वप – ख्वपया दक्षिण भेगय् लाःगु सिपारः महाद्यः (डोलेश्वर महाद्यः)याथाय् न्ह्यानाच्वंगु मेला क्वचाःगु दु । हिन्दू धर्मावलम्बितय् पवित्र तीर्थस्थलमध्ये छगू केदारनाथया छ्यं धइगु हल्ला जुइवं भारत लगायत नेपाःया थीथी थासं थन श्रावण लछियंकं मेला लगे जूगु खः ।

मेलाया लिपांगु न्हिकुन्हु वंगु सोमवाः दर्शनया निंतिं आपालं भक्तजनत वःगुलिं भीड जुयाः आपालं ई जामय् तकं च्वनेमाःगु अवस्था ब्वलंगु खः । श्रावणया लिपांगु सोमवाः नं जूगुलिं थीथी थासं वःपिं मनूत जगातिया लँ जुयाः डोलेश्वरं आशापुरी वनीपिं नं दुगु खःसा उगु लँपु चिब्या जूगुलिं नं समस्या ब्वलंगु खः ।

सामान्यतः न्यासि वनीपिंत अःपुइमा धकाः सांगाया लँ जुयाः आशापुरी वनीगु याइगु खःसा ६ किलोमिटर तापाक डोलेश्वरं नं आशापुरी वनेगु याः । साउनया दकलय् लिपांगु सोमवाः उगु लँपुइ भक्तजनतय् हुलं यानाः गाडीतकं जामय् लायेवं उगु लँपु जुयाः वयेवने यायेमाःपिंसं तसकं सास्ति फयेमाःगु खः ।

न्हिछियंकं धइथें जाम जुइवं आपालं मनूत आशापुरीइ लिबाक हे जूसां थ्यंकः वंगु खःसा अनं लिहां वःपिं नं लिबाक हे डोलेश्वर थ्यंकः वःगु खः । ताःहाकःगु व चिब्याःगु लँ थाय्थासय् स्यनाच्वंगुलिं जामया समस्या जूगु खः । तसकं वा वःगुलिं नं गाडी जामय् लानाः समस्या जूगु खः । उगु थासय् वैकल्पिक लँ दुसां तसकं पुलांगु जुयाः व्यवस्थित मजूगु कारणं उगु लँपुं न्यासि वइपिं जक वनेगु याइगु खः।