आदिवासी अधिकारयात कयाः सहलह

येँ(नेपालभाषा टाइम्स)- नेवाः मिसा दबूया ग्वसालय् आदिवासी जनजातितय् अधिकारयात कयाः छगू सहलह ज्याझ्वः जुल । दबूया ग्वसालय् वंगु शनिवाः उगु ज्याझ्वः जूगु खः ।

दबूया नायः रश्मिला प्रजापतिया सभापतित्वय् जूगु ज्याझ्वलय् नेवाः देय् दबू स्वनिगः विशेष प्रदेशया नायः श्रीकृष्ण महर्जनं नेपाःया वर्तमान संविधानप्रति नेवाः समुदायया आपत्ति व असन्तुष्टि दुसां नेवाः लगायतया आदिवासी जनजातिया हक अधिकार सुरक्षित यायेगु ह्वःप्वाः दुगुलिं उकी दुने दुहां वनाः थःगु हक अधिकार सुरक्षित यायेगु नापं थःगु अधिकार प्राप्तिया निंतिं नेवाःत थःहे दकलय् न्हापां सचेत, संगठित व जागरुक जुइमाः धयादिल ।

दबूया अध्यक्ष प्रजापतिं राष्ट्रिय रुपं नेवाः जातियात लिउने लाकातःगु खँ कनादिसें आः वडास्तरय् संगठिट जुयाः न्ह्यःने वने फत धाःसा जक उकथंया दूरीयात म्हो याये फइगु विश्वास प्वंकादिल ।

ज्याझ्वलय् नेवाः देय् दबू येँ जिल्ला नायः धनबहादुर महर्जन तिमिला, नेपालभाषा मंकाः खलः यलया नायः हिराकाजी महर्जन, वल्र्ड नेवाः अर्गनाइजेसन नेपाः च्याप्टरया सुदय शिलकार, योगी स्यस्य, सरिता प्रजापति, अन्जिरमान सिंह डंगोल, सुनिल ग्वाछा लगायत आपालं सहभागिपिंसं थःथःगु सुझाव व विचाः तयादीगु खः ।