बायर्नया जित यात्रा कायम

बर्लिन (एजेन्सी) – बायर्न म्युनिकं शनिवा: बहनि जर्मन बुंडेसलिगाय् बायार लेवरकुसनयात ४-२ बुकल । बायर्नया थ्व लिगय् झ्वलाक गुंगुगु जित ख: । उकी रोबर्ट लेवनडोस्की थ्व सिजनया व्यक्तिगत ३० औं गोल नं यात । थ्व कासा त्यायेवं बायर्नया लिगया शीर्ष स्थानय् अग्रता न्हय्गु ल्या: कायम जूगु दु । शनिवा:या मेगु कासाय् निगूगु थासय् च्वंगु बोरुसिया डर्टमुन्डं हेर्था बर्लिनयात १-० बुकल । उकी इमरे चानं निर्णायक गोल यात । शनिवा:या मेगु कासाय् माइन्जं आइनट्राख्त फ्रान्कफुर्टयात २–० पराजित यात धा:सा फोर्टुना डुसलफोर्ड व होफेनहाइमं २-२ या बराबरी म्हितल । अथेंतुं लाइपजिग व पार्डाबोनया कासा १–१ या बराबरीइ क्वचाल ।