मेसी व इन्टर मियामी दथुइ सम्झौता

एजेन्सी- अर्जेन्टिनाया स्टार कासामि लियोनल मेसी व अमेरिकी क्लब इन्टर मियामी दथुइ आधिकारीक सम्झौता जूगु दु । मेसी सन् २०२५ तक इन्टर मियामीया निंतिं म्हितीगु जूगु दु । सम्झौता लिपा मेसीं इन्टर मियामीपाखें म्हितेत थः उत्साहित जूगु धाःगु दु । ‘थ्व बांलाःगु अवसर खः, आः दक्व जानाः छगू बांलाःगु परियोजना दयेकेगु जुइ’ मेसीं धाःगु दु ।

इन्टर मियामीया सहमालिक व इग्ल्याण्डया भेट्रान कासामि डेभिड बेकह्यामं मेसीं मियामीलिसे सम्झौता यानाः थःपिनिगु म्हगस पुवंकूगु धाःगु दु । मेसीं मियामीया निंतिं जुलाइ २१य् जुइगु लिग कपया उद्घाटन कासा म्हिती ।

मेसी फ्रेञ्च क्लब पिएसजी त्वःताः मियामी वंगु खः । पिएसजीया निंतिं मेसी ७५ गू कासा म्हिताः ३२ गोल याःगु खः । निगू दशक तक बार्सिलोनाया निंतिं म्हितूम्ह मेसीं बार्सिलोनाया निंतिं ६७२ गोल याःगु दु । मेसीया हे कप्तानी अर्जेन्टिनां २०२२ या विश्वकप नं त्याकूगु खः ।

 

सम्बन्धित बुखँ

LEAVE YOUR COMMENTS