क्रोसिया न्हापांखुसी विश्वकप फाइनलय्, इंग्ल्यान्ड निराश

एजेन्सी– इंग्ल्यान्डयात २–१ गोलं बुकुसें क्रोसिया विश्वकपय् न्हापांगुखुसी फाइनलय् दुहां वंगु दु । नकतिनि क्वचाःगु कासाय् थप ईया १०७ औं मिनेटय् मान्डाजुकिकं गोल यायेवं क्रोसिया फाइनलय् वनेत ताःलाःगु खःसा इंग्ल्यान्ड निराश जुइमाःगु खः । थुकिया लिसें क्रोसिया विश्वकपया फाइनल म्हितीगु झिंस्वंगूगु देय् नं जूगु दु ।

कासाया ५ औं मिनेटय् हे इंग्ल्यान्डया रक्षक ट्रिपेरं छगू उत्कृष्ट फ्रिकिक पाखें गोल यासें इंग्ल्यान्डयात अग्रता बिउगु खः । न्हापांगु हाफय् छगू गोलं लिउने लाःसां क्रोसियां लिपांगु हाफय् इंग्ल्यान्डयात दबाबय् तसें ६८ औं मिनेटय् गोल याःगु खः । क्रोसियाया पेरिसिकं छगू बांलाःगु पासय् देपाःगु तुति ब्वयेकाः बल थिया बिइगु बराबरीया गोल जूगु खः । थ्व लिपा निगुलिं टिमय् गोल याये मफयेवं कासा थप इलय् वंगु खः ।

थप इलय् वंसां पेनाल्टि शुटआउट यायेम्वायेकं क्रोसियां थ्व कासा त्याकूगु खः । विश्वकपया सेमिफाइनलय् थप इलय् वनेधुंकाः पेनाल्टि यायेम्वायेक कासा क्वचाःगु थ्व हे न्हापांखुसी खः ।

क्रोसियां आः आइतवाः फ्रान्सलिसे फाइनल कासा म्हितीसा इंग्ल्यान्डं बेल्जियम लिसे स्वंगूगु थाय्या निंतिं प्रतिस्पर्धा याइगु जुइ ।