सम्झौता लागू याकेत माधव चीनपाखे

येँ – प्रधानमन्त्री केपी ओलीं थःगु चीन भ्रमणया झ्वलय् याना थकूगु थीथी सम्झौतातय्त मूर्त रुप बीगु लागिं नेकपाया वरिष्ठ नेता लिसें पुलांम्ह प्रधानमन्त्री माधव नेपाल चीन झाःगु दु । नेपाः–चीन स्वापूयात सरकारीस्तरय् जक मखु पार्टीस्तरय् नं विकास याना यंकेगु ताः तयाः वय्कः चीन झाःगु खँ सीदुगु दु ।

वय्कः लिसें नेकपाया केन्द्रीय दुजः कृष्णगोपाल श्रेष्ठ नं चीन झाःगु दु । प्रम ओलीं चीन भ्रमणया झ्वलय् चिनियाँ रेल नेपाः हयेगु व चीनया बन्दरगाहत समेत नेपाःया सामान ल्ह्ययेत प्रयोग याके बीगु सम्झौता याना वःगु खः । आः उकियात मूर्त रुप बीगु लागिं नं नेता नेपालया थ्व भ्रमण जूगु खँ धाःगु दु ।

सूत्रतय्सं धाः कथं न्हापा न्हापा राजनीतिकस्तरय् जुइगु थज्याःगु सन्धि सम्झौतायात लिपा ‘फलोअप’ यायेगु जिम्मा कर्मचारीतय्त त्वःता बीगु जूगुलिं उकिया कार्यान्वयन बांलाक जुइ मखु । उकिं थ्व मुद्दायात राजनीतिकस्तरं हे न्ह्यःने न्ह्याकेगु लागिं थ्व भ्रमण जूगु खँ धाःगु दु ।

थ्वहे भ्रमणया इलय् चीनं दकलय् रुचीपूर्वक न्ह्यःने हयाच्वंगु ‘वन बेल्ट वन रोड’ परियोजनायात नेपालं गुकथं साथ बी फइ धइगु खँय् नं ठोस रुपं चर्चा जुइगु दावी सूत्रं याःगु दु । थ्व मुद्दाय् नेपाःया धापू स्पष्ट मजूगु चिनियाँ दावी दु ।