कम्प्युटरय् नेपाल संवत्या तिथि

येँ (नेपालभाषा टाइम्स)- फुक्कं सरकारी दस्तावेजय् विक्रम संवत्या नापनापं नेपाल संवत् नं छ्यला यंकेगु धकाः नेपाः सरकारं याःगु निर्णययात ग्वाहालि जुइ कथं आः न्हिथं छ्यलीगु कम्प्युटर व ल्यापटवय् हे न्हिंन्हिं नेपाल संवत्या तिथि नं वइगु ‘विजार्ड’ तयार याःगु दु ।

तिथिमिति डट कमपाखें थ्व विजार्ड डाउनलोड यानाः न्ह्याम्हेस्यां नं थःगु कम्प्युटर वा ल्यापटवय् नेपाल संवत्या थ्व तिथि तये फइ । थौंकन्हय् मनूतय् ल्यावटप व कम्प्युटरय् विक्रम संवत् व इस्वी संवत्या मिति वइगु व्यवस्था यानातःगु दु । आः उकी तुं नेपाल संवत्या तिथि नं वइगु व्यवस्था थुकिं याइ । अथे वःगु तिथियात कपी यानाः थःगु लेटरहेडय् गन माल अन पेस्ट नं याये फइ ।

राष्ट्रिय विभूति शंखधर साख्वाः प्रतिष्ठानया आह्वान कथं स्पाइरलोजिक्स इन्टरनेशनलपाखें थ्व विजार्ड दयेकूगु खः । प्रतिष्ठानया नायः ज्ञानराम श्रेष्ठं कनादीकथं थ्व विजार्ड आः नेपाल सरकारया कर्मचारीतय् दथुइ प्रस्तुत यानाः सरकारयात तुं लःल्हायेगु तयारी जुयाच्वंगु दु ।