ने. सं. ११४४ कौलाथ्व तृतीया -

जहाजय् कोरोना संक्रमित लुइवं निगमया कर्मचारीयात कारवाही

येँ (नेपालभाषा टाइम्स) – नेपाल वायुसेवा निगमं मलेशियां येँया निंतिं वःगु छगः जहाजय् छम्ह यात्रु कोरोना संक्रमित लुइवं निगमया मलेशिया स्टेशनया कन्ट्री म्यानेजरलिसें कर्मचारीयात कारवाही याःगु दु। वंगु डिसेम्बर ३० कुन्हु मलेशियां येँया निंतिं वःगु निगमया जहाजय् छम्ह यात्रु कोरोना पोजेटिभया रिपोर्ट ज्वना वयेवं जिम्मेवारीइ लापरवाही याःगु धासें निगमया मलेशिया स्टेशनया कर्मचारीयात कारवाही याःगु खः ।

वंगु डिसेम्बर ३० कुन्हु मलेशियां येँया निंतिं वःगु निगमया न्यरो बडी जहाज ए-३२० य्१४५ म्ह यात्रु वःगु खः । उकीमध्ये छम्ह यात्रु कोरोना पोजेटिभ जूगु लुइवं निगमया मलेशिया स्टेशनया कन्ट्री म्यानेजर नरेशकुमार श्रेष्ठ, स्टेशन म्यानेजर युवराज आचार्य, फाइनान्स म्यानेजर इन्द्र थापायात कारवाही याःगु खः ।

मलेशियां वःगु जहाजया छम्ह यात्रुयाके कोरोना पोजेटिभया रिपोर्ट लुइवं निगमया मलेशिया स्टेशनया कर्मचारीपाखें गम्भिर लापरवाही जूगु धासें इपिं कर्मचारीयात आवंलि मलेशिया स्टेशनय् गबलें नं वने मदइकथं कन्ट्री म्यानेजर श्रेष्ठ व स्टेशन म्यानेजर आचार्ययात लित सःतूगु खः । थापायात धाःसा लित सःतूगु मदु ।

निगमया ४०१६ नं.या उडान त्रिभुवन विमानस्थलय् अवतरण यायेधुंकाः विमानस्थलया स्वास्थ्य कक्षय् यात्रुतय् पीसीआर परीक्षण याःगु इलय् उम्ह यात्रुं कोरोना पोजेटिभया रिपोर्ट ज्वना वःगु लूगु खः । वयां लिपा विमानस्थलय् छझा हल्लाखल्ला नं जूगु खः । वयां लिपा कोरोना पोजेटिभया रिपोर्ट ज्वना वःम्ह यात्रुलिसें मेपिं न्यय्प्यम्हेसित होटल क्वारेन्टिनय् तये यंकूगु खःसा मेपिं यात्रुयात छेँय् छ्वया बिउगु खः ।

उगु घटना लिपा निगमया स्वम्हं कर्मचारीयाके न्हापां स्पष्टीकरण न्यनेगु ज्या जूगु खःसा चित्त बुझे जुइकथंया लिसः मवयेवं इमित लित सःतेगु नापं होटलया क्वारेन्टिनय् च्वनाच्वंपिं यात्रुतय् दक्वं खर्च दामासाहीं असुल यायेगुकथं कारवाही याःगु खः । इपिं कर्मचारीयात निगमया बाह्य व आन्तरिक स्टेशनया निंतिं खटे जुइपिं आवश्यक जनशक्ति व्यवस्था यायेत गठन यानातःगु पोष्टिब कमिटीं स्पष्टिकरण न्यंगु खः ।