जुजुकाजीया ‘मतिनाया गल्लि’ पिदन
येँ(नेपालभाषा टाइम्स)÷वरिष्ठ संगीतकःमिलिसें नांजाःम्ह म्येँ हालामि जुजुकाजी रंजितया न्हूगु एकल म्येँचाः ‘मतिनाया गल्लि’ पिहां वःगु दु । वंगु शुक्रवाः रसियन कल्चर सेन्टरया रसियन हाउसय् जूगु ज्याझ्वलय् म्येँ हालामि रंजितया उगु एकल म्येँचाःया पितब्वज्या याःगु खः ।
नेपाल रुस मैत्री तथा सांस्कृतिक संघया नायः स्वराज शाक्यया सभापतित्वय् जूगु ज्याझ्वलय् मूपाहांकथं झायादीम्ह जनकवि दुर्गालाल श्रेष्ठं ज्याझ्वःया उलेज्या यासें म्येँचाः पितब्वज्या यानादीगु खः ।
जनकवि दुर्गालाल श्रेष्ठं च्वयादीगु म्येँय् वरिष्ठ संगीतकार मनराजा नकःमि व जुगल डंगोलं लसय् हनादीगु खः । म्येँचालय् दुथ्याःगु ज्वःम्येँय् वरिष्ठ म्येँ हालामि रंजितयात रत्नशोभा महर्जन व निशा देसारं साथ बियादीगु दु ।
ज्याझ्वलय् नवासें जनकवि दुर्गालालं द्यः धइपिं खिउँगु थासय्, फोहर थाय् जूसां गन मतिना दइ अन हे दइ धइगुया भाव म्येँचाःया ट्राइटल ट्रायकं पिब्वयाच्वंगु दु धयादिल । नेवाः न्ह्यलुवालिसें नेपालभाषा एकेदेमिया भाइस चान्सलर मल्ल के. सुन्दरं म्येँचाःया नां व म्येँग्वःत स्वयबलय् भारतया नांजाःम्ह कविलिसें दार्शनिक कवीरया वाणीपाखें प्रभावत जूगु खनेदु धयादिल ।
साहित्यकारलिसें संचारकःमि, निर्देशक प्रकाश साय्मि, पुलांम्ह मुख्य सचिवनापं केसु गुथिया संस्थापक नायः केशवराज राजभण्डारीं नं नुगःखँ तयादीगु ज्याझ्वलय् म्येँ हालामि जुजुकाजी रंजित छपु रसियन भाय्या म्येँलिसे प्यपु म्येँ न्यंकादीगु खः ।
म्येँ हालामि रंजितया जहान कौशल्या रंजितं पिथनादीगु म्येँचाः पितब्वज्या ज्याझ्वलय् वय्कलं हे लसकुस यानादीगु खःसा म्येँचालय् दुथ्याःगु छपु म्येँया म्युजिक भिडियोया नं पितब्वज्या याःगु खः ।
LEAVE YOUR COMMENTS