मांकाःद्यःया सतः पुनःनिर्माण क्वचाल

येँ (नेपालभाषा टाइम्स) – येँया नुगःचु तिंख्यःस्थित मांकाःद्यःया देगः छचाःलिं सतःया पुनःनिर्माण क्वचाःगु दु । येँ महानगरपालिका सम्पदा तथा पर्यटन विभागं पुनःनिर्माण याःगु मांकाःद्यः परिसरया छचाःलिंया सःतया येँ महानगरपालिकाया कार्यवाहक प्रमुख सुनिता डंगोलं उलेज्या यानादिल ।

उगु इलय् कार्यवाहक प्रमुख डंगोलं पुनःनिर्माण जूगु संरचनायात थःपिनिगु छेँ थें हे सुसाःकुसाः यानाः संरक्षण यानातयेमाः धयादिल । सरोकारवाला निकाय, ज्याकू, गुथि संस्थान, स्थानीय समुदाय, श्रद्धालु सकसिगुं समान अपनत्व दयेमाःगु खँय् बः बियादिसें वय्कलं धयादिल, ‘सकसिगुं भूमिकायात सम्मान यानाच्वना । लिसें याकनं हे पुनःनिर्माण सम्पन्न जूगु संरचना गुथि संस्थानयात लःल्हायेत तयार दु । तर उकिया उपयोग गुकथं जुइ धइगु योजनाय् स्पष्ट जुइत स्वयाच्वना ।’

वय्कलं धयादिल, ‘करदाताया लगानीइ निर्माण जूगु थज्याःगु स्मारक क्षेत्रय् व्यावसायिक क्रियाकलाप यायेगु खँय् जिपिं सहमत जुइ फइमखु मखु । थज्याःगु क्षेत्रय् धामिर्शक, सांस्कृतिक व सामाजिक क्रियाकलाप जक संचालन यायेमाः ।’

थाय्या बारे पुलांगु ज्ञान व जानकारी दुपिं स्थानीयया ग्वाहालिं ताःई न्ह्यःनिसें बन्द जुयाच्वंगु लःया निकास चायेकेफत आः सकसिगुं समन्वयय् श्रद्धालुतय् निंतिं चःबि नं याकनं निर्माण जुइ धइगु खँय् थः आशावादी जूगु वय्कःया धापू दु ।

सम्पदा तथा पर्यटन समितिका संयोजक आशामान संगतं दुनाच्वंगु, क्षतिग्रस्त सम्पदा स्वयाः महानगरपालिका च्वँच्वने फइमखु धासें थ्व हे कारणं मेमेगु निकायया दायित्व व जिम्मेवारी दुगु सम्पदा पुनःनिर्माण, संरक्षण व व्यवस्थापनय् महानगरपालिकां बजेट विनियोजन याना वयाच्वनागु कनादिल । ‘सम्पदा क्षेत्रया माया जिमित नं उलि हे दु, गुलि मेपिंके दु । उकिं सम्पदा क्षेत्रया भावना सीके बीगु जुइमखु’, संगतं धयादिल ।

सहअस्तित्व स्वीकार यानाः विवाद ज्यंके फइ दसु मांकाःद्यःया सतः पुनःनिर्माण खः धासें २२ वडाअध्यक्ष चिनिकाजी महर्जनं धयादिल, ‘सहअस्तित्व स्वीकार यानाः विवाद ज्यंके फइ । थ्व प्रक्रियापाखें प्राचीन स्मारक क्षेत्रया पुनःनिर्माण याये फइ धइगु दसु मांकाःद्यःया सतः पुनःनिर्माण खः ।’

पुरातत्व विभागया महानिर्देशक सौभाग्य प्रधानाङ्गं सांस्कृतिक, धार्मिक, पुरातात्विक सम्पदा संरक्षण, संवद्र्धन व पुनःनिर्माण अभियानय् महानगरपालिकां ठोस ज्या सम्पन्न याःगु धासें महानगरया भूमिकायात च्वछानादिल ।

उगु इलय् गुथि संस्थानया उपप्रशासक राजेन्द्र दाहाल, मांकाःद्यःया मू पुजारी दीपकहर्ष वज्राचार्यं नं थःथःगु धारणा तयादीगु खः ।
वि.सं. २०७२ सालया तःभुखाचं जीर्ण जूगु सतः ०८१ मंसिर २४ गते पुनःनिर्माणया निंतिं शिलान्यास याःगु खः । १९९७ सालय् कयातःगु छपाः किपाया लिधंसाय् सतः परम्परागत निर्माण सामग्री व शैलीइ ८ गू करोड ९४ गू लख पीखुद्वः लागतय् पुनःनिर्माण याःगु खः ।

नेपालभाषा टाइम्स

च्वमिया मेमेगु

• थाइल्याण्डया ब्वनेकुथिइ गोलीकाण्ड, च्याम्ह सित
• अग्रगामी मोर्चा घोषण
• जन्मसिद्ध नागरिकताय् ट्रम्पया न्हूगु आदेश
• कोशीइ नं न्हूगु सरकार
• ‘विपन्न, सीमान्तकृतया उत्थान ज्या जुयाच्वंगु दु’