तिंकरय् नेपालं अध्यागमन ज्याकू चायेकीगु

येँ (नेपालभाषा टाइम्स)÷ दार्चुलाया स्वंगू देशया नाका स्वाःगु थासय् नेपालं अध्यागमन कार्यालय चायेकीगु जूगु दु । दार्चुलाया व्याँस गाउँपालिकास्थित तिंकरय् सरकारं निलाया दुने अध्यागमन कार्यालय चायेकत्यंगु खः ।

म्हिगः येँय् जूगु छगू ज्याझ्वलय् न्ववायेगु झ्वलय् गृहमन्त्री रमेश लेखकं चीन व भारतलिसे सुदूरपश्चिमया व्यापारिक स्वापू बढे याना यंकेत्यनागु खँ कनादीगु खः । अन चीन व भारत स्वायेगु निंतिं सतक दयेकेगु, सुक्खा बन्दरगाह व अध्यागमन कार्यालय चायेकेगु ज्या न्ह्यानाच्वंगु दु ।

गृहमन्त्री लेखकं महाकाली करिडोर व सेती लोकमार्ग लगायतया महत्वपूर्ण लोकमार्ग दयेकेगु ज्या न्ह्याकाः भारत व चीनलिसे यातायात स्वायेगु, नेपाः लिसें स्वंगूगु देय्या नागरिकतय्सं नं उगु सतक छ्यलाः चीनया महत्वपूर्ण थाय्, हिन्दू व बौद्ध धर्मावलम्बीतय् पवित्र तीर्थस्थल मानसरोवर व भारतया तःधंगु सहर स्वायेगु कुतः जुयाच्वंगु खँ कनादीगु दु । थुकिया निंतिं गृह मन्त्रालयं वइगु निलाया दुने हे तिंकरय् अध्यागमन कार्यालय चायेकेगु व तिंकर जुयाः हे नेपाःमि व विदेशीतय्त सहज रुपं मानसरोवर कैलाश वनेगु लँपु चायेकेगु खँ नं वय्कलं कनादीगु दु ।

भारत संसारया उदीयमान अर्थतन्त्र दुगु देय् व चीन संसारया हे निगूगु अर्थतन्त्र दुगु देयु जूगुलिं सुदूरपश्चिमया भूगोल निगुलिं देय्या नितिं महत्वपूर्ण जुयाच्वंगु खँ कँसें गृहमन्त्री लेखकं आः थ्वहे भूमिं चीन व भारत लिसेया व्यापारिक सम्बन्ध विस्तारया नितिं कुतः जुयाच्वंगु खँ धया–दीगु दु ।