यलय् ट्राफिक समस्या ज्यंकेत पहल

येँ – यल महानगरपालिकां सम्पदा क्षेत्रय् ट्राफिक व्यवस्थापन यायेत अध्ययन प्रक्रिया न्ह्याकूगु दु । विश्व सम्पदा सूचीइ सूचीकृत थासय् सवारी साधनया चाप अप्वया वंगु व पर्यटकयात नं लिच्वः लानाच्वंगुलिं ट्राफिक व्यवस्थापनया निंतिं अध्ययन यायेगु ज्या न्ह्याकूगु खः ।

मंगलबजाः व उगु क्षेत्र जःखः सवारी साधनया आवागमन म्हो यायेगु निंतिं अध्ययन जुयाच्वंगु खँ यल मनपाया प्रमुख चिरिबाबु महर्जनं कनादीगु दु । दरवार क्षेत्र व जःखःया पार्किङं सतक अस्तव्यस्त जूगुलिं आः उगु लागाय् पार्किङ याके मबीगु व लिसें वान–वे सवारी साधन चले याकेगु योजना मनपां दयेकाच्वंगु दु ।

सडक व्यवस्थापनया निंतिं मनपां न्यय्म्ह नगर प्रहरी थप यायेत्यंगु दु । उमित सतक व्यवस्थापनया ज्याय् छ्यलीगु खँ धाःगु दु । मेयर महर्जनं दरवार क्षेत्र पार्किङ मुक्त क्षेत्र दयकेगु व वान–वे सवारी सञ्चालन निगुलिं थाकुगु खँ कनादिसें महानगर ट्राफिक योजना अन्तर्गत सम्पदा क्षेत्रया ट्राफिक व्यवस्थापनया निंतिं अध्ययन जुयाच्वंगु जानकारी नं बियादिल । वय्कलं स्थानीय वासिन्दाया ग्वाहालिं जक थ्व सफल याये फइगु खँ नं कनादिल ।

आः तिंख्यलय्
पिक एण्ड ड्रप

येँ महानगरपालिकां थ्वहे वइगु पुस १ गतेनिसें तिंख्यः जःखः च्वंगु फुक्क हे लागाय् गाडी दिकाः यात्रु काये मदइगु नियम हयेत्यंगु दु । उगु लागाय् आः यात्रु तयेगु व क्वकायेगु (पिक एण्ड ड्रप) जक याये दइगु याये त्यंगु दु ।

अन गाडी दिकीपिंसं यानाः यक्वसित लिच्वः लानाच्वन धासें येँ मनपाया मेयर विद्यासुन्दर शाक्यं आवंलि अन पिक एण्ड ड्रप जक याकेगु व्यवस्था हयेत्यंगु खः । थुकिं येँया यातायात छुं भचा जूसां हलुका जुइगु आशा यानातःगु दु ।