उपेन्द्र यादवयात परराष्ट्र ! , संविधान संशोधनया प्रतिवद्धता वःसा जक मन्त्री स्वीकार

येँ – सम्भवतः थौं विस्तार जुइगु प्रधानमन्त्री केपी ओलीया सरकारय् संघीय समाजवादी फोरमया अध्यक्ष उपेन्द्र यादव नं मन्त्रीया रुपय् दुहां वनीगु सम्भावना प्रवल जुया वःगु खँ सीदुगु दु ।सूत्रतय्सं धाः कथं उपेन्द्र यादव थ्व सरकारय् परराष्ट्र मन्त्रीया रुपय् समावेश जुइगु सम्भावना दु । वय्कः न्हापा नं परराष्ट्र मन्त्री हे जुयादीगु खः । तर वय्कः न्हापा उपप्रधानमन्त्री समेत जुयादीगु जूगुलिं आः नं उपप्रम सहित मन्त्री जुइ दयेमाःगु माग जुयाच्वंगु दु । सरकारय् माओवादी मन्त्रीतय् नेतृत्व यानाः वइम्हेसित नं उपप्रम हे दयेकेगु खँ जुयाच्वंगु दु । थथे जुल धाःसा सरकारय् अनावश्यक रुपं उपप्रधानमन्त्रीत थपे याये मालीगु स्थिति वइगु खँय् चिउताः प्वंकाच्वंगु सीदुगु दु । ससंफों संविधान संशोधनया प्रतिवद्धता वःसा जक सरकारय् वनेगु खँ धया वयाच्वंगु दु ।

छगू प्रदेशया नागरिकं मेगु प्रदेशय् जागिर नये दइ ला ?
येँ – सरकारं लोकसेवा आयोगयात नं आः प्रदेश संरचनाय् यंकीगु जूगु दु । प्रदेशय् स्तरय् कर्मचारी भर्ना यायेगु निंतिं लोकसेवा आयोग गठन यायेत स्वयाच्वंगु खःसां उगु प्रदेशय् मेगु प्रदेशया मनूतय्सं जागिर नये दइ लाकि मदइ धइगु खँय् धाःसा अन्योल जुयाच्वंगु दु । निजामती सेवाया कर्मचारी नियुक्त यायेगु ज्या लोकसेवा आयोगया खः । तर आः प्रदेशय् हे लोकसेवा आयोग दयेधुंकाः प्रदेशया कानून कथं जक कर्मचारी भर्ना यायेगु ज्या जुइगुलिं थज्याःगु अन्यौल ब्वलंगु खः । संविधानया धारा २४४ य् प्रत्येक प्रदेशय् छगू सेवा आयोग दइगु खँ दुथ्याकातःगु दुसा उगु हे धाराया उपधारा २ स संघीय संसदं कानून दयेकाः मापदण्ड दयेके फइगु व्यवस्था यानातःगु दु । केन्द्रया लागिं कर्मचारी काइबलय् देय्न्यंकया जनतां जाँच बी फइ । तर प्रदेशय् थज्याःगु व्यवस्था यायेगु ज्या प्रदेशयागु हे जूगुलिं कर्मचारी भर्ना यायेबलय् नं प्रदेशया दुनेया जनतां जक जाँच बीगु दइगु व्यवस्था जुल धाःसा प्रदेशया जनताया हित जुइगु विश्वास जुयाच्वंगु दु ।

छखा हे छेँय् प्यंगू मन्त्रालय !
येँया सिंहदरवार थें प्रदेश नम्बर २ या जनकपुर चुरोट कारखानाया प्रदेश सरकारया केन्द्र दयेकीगु जूगु दु । मुख्यमन्त्रीया ज्याकू व आवास लिसें फुक्क हे मन्त्रालय चुरोट कारखानाया कम्पाउण्डय् तये यंकीगु दु । अनया छखा छेँय् आः प्यंगू मन्त्रालय तयेत्यंगु दु । अनया कर्मचारी निवासय् आः सामाजिक विकास, आर्थिक मामिला तथा योजना, आन्तरिक मामिला तथा कानून व उद्योग, पर्यटन वन तथा वातावरण मन्त्रालय तयेत्यंगु दु ।

सम्बन्धित बुखँ

LEAVE YOUR COMMENTS