काभानी फ्रान्सविरुद्ध म्हिते मफइगु स्थितिइ

विश्वकप २०१८ या न्हापांगु क्वार्टरफाइनलय् शुक्रवाः उरुग्वे व फ्रान्स दथुइ जुइत्यंगु दु । थ्व कासाय् उरुग्वेया स्टार कासामि इडिन्सन काभानी धाःसा म्हिते फइ मफइ अझं अनिश्चित तिनि । उरुग्वे नं थः स्ट्राइकर काभानी अझं चोटग्रस्त तिनि व शुक्रवाः म्हितेफइ मफइ धायेमफुनिगु खँ धाःगु दु ।

प्रिक्वार्टरफाइनलय् पोर्चुगल विरुद्ध म्हितुबलय् काभानी चोटग्रस्त जूगु खः । वयागु पिलाक्वय् स्यानाच्वंगु खँ धाःगु दु । पोर्चुगलयात बुकेगु निंतिं काभानीं निगू गोल याःगु खः । निगूगु गोल याःगु छुं ई लिपा पिलाक्वय् स्याना वयेवं काभानीं मैदान त्वःतूगु खः । मैदानं पिहां वयेधुंकाः काभानीं धाःगु खः, ‘जितः तःधंगु छुं जूगु मदु थें च्वं ।

पिलाक्वय् स्यानाच्वंगु दु, उकिं मैदान त्वःतेमाल ।’ उरुग्वेया फुटबल एशोसियसनं काभानीयात पिलाक्वय् स्यानाच्वंसां स्क्यानय् धाःसा वयागु मसल्स गुनाच्वंगु खनेमदु धाःगु दु । प्रशिक्षक ओस्कार टाबारेजं पोर्चुगल विरुद्ध कासा त्यायेधुंकाः धाःगु खः, ‘काभानीं आः मेगु कासा म्हितेखनी धायेमफु ।’

३१ दँया काभानीं उरुग्वेया निंतिं सछि व न्यागू कासा म्हिता ४५ गोल यायेधुंकूगु दु । थुगुसी विश्वकपय् लुइस स्वारेज लिसे तालमेल मिले यानाः गोल यायेत सफल जुयाच्वंम्ह काभानी मदइगु अवस्थाय् उरुग्वेयात फ्रान्सविरुद्ध म्हितेत थाकुइगु अनुमान जुयाच्वंगु दु ।

सम्बन्धित बुखँ

LEAVE YOUR COMMENTS