साइक्लिङय् नेपाःयात निगू स्वर्ण

येँ – झिंस्वक्वःगु दक्षिण एशियाली कासा (साग)या स्वन्हुया न्हि कुन्हु नं नेपालं खुगू स्वर्ण ल्हातय् लाकूगु दु । थ्व प्यंगू स्वर्ण लिसें नेपाः २९ गू स्वर्ण त्याकाः पदक धलखय् दकलय् न्ह्यःने दु । नेपालं बुधवाः साइकलिङ, तेक्वान्डो, कराते व उसुइ स्वर्ण त्याकूगु खः । उसुपाखे दिपक हमालं मिजंतय् नान क्वातय् भारतया साजन लामायात बुकसें स्वर्ण त्याकूगु खः ।

थ्व विधाय् पाकिस्तानया मोहम्मद दाउदं कास्य त्याकल । अथेहे अनुपमा मगरं करातेया ६८ केजी तौल समूहय् स्वर्ण त्याकूगु खः । मगरं पाकिस्तानया कासामियात लिउने लाकुसे स्वर्ण ल्हातय् लाकूगु खः । तेक्वान्डोय ६२ केजी समूह संगीता बस्याल व ८७ केजीं क्वय्या तौल समूह सक्षम कार्कीं स्वर्ण त्याकूगु खः ।

गोकर्णय् जूगु साइक्लिङय् नेपालं निगू स्वर्ण ल्हातय् लाकूगु खः । साइक्लिङया १ किलोमिटर दूरीया डाउनहिलय् राजेश मगरं स्वर्ण त्याकूगु खः । थ्व प्रतिस्पर्धा नेपाःया हे नीरव श्रेष्ठं रजत ल्हातय् लाकल । मगरं १ मिनेट ४९ सेकेन्डं उगु दूरी पूवंका स्वर्ण ल्हातय् लाकूगु खः । मिस्तय् पाखे नं निश्मा श्रेष्ठं स्वर्ण व जमुना थापां रजत त्याकूगु खः ।

मंगलवाः जूगु भलिबलया फाइनलय् धाःसा नेपाःया मिस्तय् टिम भारतपाखें पराजित जूगु खः । तसकं प्रतिस्पर्धात्मक कासाय् भारतं नेपाःयात ३–२या सेटं बुकूगु खः । न्हापांगु सेटय् पराजित जुइधुंकाः नं नेपालं मेगु निगू सेट झ्वःलाक त्याकूगु खः । तर लिपांगु निगू सेट धाःसा भारतं त्याकाः स्वर्ण ल्हातय् लाकल ।

सम्बन्धित बुखँ

LEAVE YOUR COMMENTS