
च्यापियन्स लिगया क्वाटरफाइनल कासा शुरु जूगु दु । क्वार्टरफाइनल अन्र्तगत मंगलवाः जूगु कासाय् लिभरपुल व टोटनह्याम त्याःगु दु । लिभरपुलं पोर्टोयात व टोटनह्यामं म्यानचेस्टर सिटीयात बुकूगु खः ।मंगलवाः जूगु क्वाटरफाइनलया न्हापांगु लेगय् प्रिमियर लिगया शीर्ष थासय् लानाच्वंगु लिभरपुलं पोर्चुगलया एफसी र्पोटोयात २—० गोलं बुकूगु खः।
र्पोटोयात दबाबय् तयातःगु लिभरपुलं निगूलि गोल न्हापांगु हाफय् हे याःगु खः । कासाया न्यागू मिनेटय् नेबी केइता गोलं यानाः लिभरपुल यात अग्रता बिउगु खः । रोबर्टो फिर्मिनो २६ आंै मिनेटय् मेगु गोल याःगु खः । फिर्मिनाें अलेक्जेन्डर आरनलन्डया पासय् गोल याःगु खः । र्पोटोयात गोल यायेगु ह्वःताः चूलाःगु जूसां लिभरपुलया गोलरक्षक एलिसनं वयात बिफल यानाबिल ।
निगूगु लेग पोर्टाेया मैदानय् अप्रिल १७ तारिखय् जुइ ।अथेहे मेगु क्वाटरफाइनल कासाय् सन ह्युङ मिनं याःगु छगू जक गोलया ग्वाहालिं टोटनह्यामं म्यानचेस्टर सिटीयात १–० गोलं बुकल । न्हापांगु हाफ बराबर जूगु कासाय् सन ह्युङ मिनं निगूगु हाफया ७८ औं मिनेटय् गोल याःगु खः । टोटनह्यामयात दबाबय् तःसां सिटी गोल यायेमफुत ।
म्यानचेस्टर सिटीयात पेनाल्टी नं चूलाःगु खः, तर सर्जियो अग्युरोया प्रहार टोटनह्यामया गोलरक्षक ह्युगो लोरिसं पनाबिल । थ्व कासाय् टोटनह्यामया कप्तान हेरी केन घाइते नं जूगु दु । चोटया कारणं केनं बाँकी सिजन म्हिते मखनिगु जूगु दु । निगूगु लेग म्यानचेस्टर सिटीया मैदानय् अप्रिल १७ तारिखय् जुइ ।
LEAVE YOUR COMMENTS