चितवन टाइगर्सं एभरेष्ट प्रिमियर लिगया फाइनलय्

एजेन्सी- चितवन टाइगर्सं एभेरेष्ट प्रिमियर लिग टि–२० या फाइनलय् थ्यंगु दु । बुधवाः जूगु न्हापांगु क्वालिफायरय् पोखरा राइनोजयात बुकाः चितवन टाइगर्स न्हापांखुसी एभरेष्ट प्रिमियर लिगया फाइनलय् थ्यंगु खः । चितवनं पोखरायात ९ विकेटं बुकूगु खः ।

बुधवाः किपूया टियू मैदानय् जूगु न्हापांगु क्वालिफायर कासाय् पोखरां बिउगु ६७ रनया सामान्य लक्ष्य चितवनं ७.५ ओभरय् छगू विकेटया क्षतिइ पूवंकूगु खः । चितवनया निंतिं ओपनर मोहम्मद शाहाजादं २६ बलय् ४८ रन दयेकाः आउट जूगु खः । मोहम्मद शाहाजादं न्हय्गू चौका व निगू छक्का थ्वाःगु खः । अथे हे चितवनया हासिम अन्सारीं छगू चौका व छगू छक्काया ग्वाहालिं अविजित १४ रन व करिम जन्नमं अविजित ४ रन दयेकूगु खः । पोखराया नन्दन यादवं छगू विकेट काःगु खः ।

टस बुइवं न्हापां ब्याटिङ याःगु पोखरा राइनोजं १५ ओभरया कासा म्हिताः ६६ रन जक दयेकाः अलआउट जूगु खः । पोखराया सुनिल धमलां १८ व सुशन भारीं १२ रन दयेकूगु खःसा मेपिं कासामित दोहोरो अंकं मदयेकुसे हे आउट जूगु खः । पोखरा राइनोजं ४१ रन दयेकूबलय् छगू विकेट जक वंगु खःसा मेगु २५ रन दयेकूबलय् ९ विकेट वंगु खः । पोखरायात फाइनलय् वनेत मेगु छगू मौका दनि । निगूगु क्वालिफायर कासा त्याकत धाःसा पोखरायात फाइनलय् वनेगु मौका दइ ।

चितवनया निंतिं सागर ढकाल व शाहब आलमं प्यंगू प्यंगू विकेट काःगु खः । प्यंगू विकेट काःम्ह सागर ढकालं प्यंगू ओभर बलिङ यानाः १० रन जक बिउगु खःसा प्यंगू विकेट हे काःम्ह मेम्ह कासामि शाहब आलमं नं प्यंगू ओभर बलिङ यानाः १४ रन जक बिउगु खः । चितवनया कप्तान सोमपाल कामी व करिम जन्नतं छगू छगू विकेट काःगु खः ।