नेपोलीं त्याकल इटालियन कप

रोम (एजेन्सी) – नेपोलीं युभेन्ट्सयात पेनाल्टीइ ४-२ बुंका बुधवा: बहनि खुक्व:गु खुसी इटालियन कप त्याकूगु दु । स्वकुमि मदूगु स्टाडियो ओलम्पिकोय् जूगु कासाया निर्धारित ९० मिनेटया कासा गोलरहित बराबरीइ क्वचा:गु ख: । टाइब्रेकरय् युभेन्ट्सया नितिं पउल ड्याबेला व डानिलो गोल याये मफुत । नेपोलीपाखे आरकाडिज्स मिलिकं निर्णायक गोल या:गु ख: । सन् २०१४ लिपा नेपोलीं त्याकूगु थ्व न्हापांगु उपाधि ख: । अथेंतु प्रशिक्षकया ल्याखं नेपोलीया जेनारो गटुसोया नं थ्व न्हापांगु उपाधि ख: । डिसेम्बरय् कार्लो एन्सेलोटी वर्खास्त जुइवं गटुसोयात नेपोलीइ अवसर व:गु ख: ।