ऐककरातेया विजयी कासामिपिंत सिरपाः लःल्हात

येँ – न्याक्वःगु कंकेश्वरी अन्तरविद्यालय खुल्ला ऐकायन कराते कासा वंगु शनिवाः क्वचाल । कासाय् थीथी विद्यालयपाखें तौल समूहय् प्रतिस्पर्धा याःगु खः । कासाया उलेज्या येँ महानगर पालिकाया प्रमुख विद्यासुन्दर शाक्यं यानादीगु खः । कासाया उलेज्या यासें येँ महानगर प्रमुख शाक्यं खेलकूद विश्वय् नेपाःयात म्हसीकेगु छगू बांलाःगु माध्यम खः धयादिल ।

वय्कलं कासामि त्यात धाःसा देसं हे त्याकूगु जुइ धासें प्रत्येक कासामिं देय्या निंतिं नं पदक त्याके फयेमा धकाः भिंतुना नं बियादिल । कासाय् मिजंपाखे ३० केजी तौल समूहय् सजन तामाङ, शिशिर पुन मगर, संगम थपलिया छसिकथं न्हाप, लिउ व लियांलिउ लाःगु खःसा ३५ केजी तौल समूहय् गगन राउत न्हाप, सुदीप मगर लिउ व छेम्जुंग लामा लियांलिउ लाःगु खः ।

४० केजी तौलय् रिजन पौडेल, नारायण लामा व अनिश भुसाल छसिकथं न्हाप, लिउ व लियांलिउ लायेत ताःलात । ४५ केजीइ मनिष श्रेष्ठ, सजाय राई व रविन तामाङ, छसिकथं न्हाप, लिउ व लियांलिउ कासाया ५५ केजी तौल समूहपाखे अजिस राई न्हाप, मनिष राई लिउ व राज श्रेष्ठ लियांलिउ लाःगु दु ।

थुकथं हे मिसातय् ४० केजी तौल समूहय् पुसन लामा, मनिषा लामा व रोजिना लामा न्हाप, लिउ व लियांलिउ लाःगु दुसा ५० केजी तौलय् मनिषा घले न्हाप, दीक्षा राई लिउ व रिना ढकाल लियांलिउ लाःगु दु ।

विजयी कासामिपिंत नेपाल बुदोकैदो कराते संघया अध्यक्ष काजीमान श्रेष्ठ, शान्ति निकुञ्मा मा.विया प्रधानअध्यापक राधेश्याम प्रधान, वरिष्ठ सितेरियो कराते प्रशिक्षक प्रकाश प्रधान, नेपाल ऐकायन कंकेश्वरी शाखाया सल्लाहकार शंकर महर्जन व येँ मनपा १९ वडा सदस्य मधुसुदन प्रधानं सिरपाः लःल्हानादिल ।