विश्वकप पुलुपालु

नकआउटनिसें न्हूगु बल

विश्वकप फुटबल अन्तर्गत समूह चराणय् कासा म्हितका वयाच्वंगु बल हिलीगु जूगु दु। विश्व फुटबलया सर्वोच्च संस्था फिफां रसिया विश्वकप समूह चरणय् म्हितकूगु बल नकआउट चरणय् मम्हितकूसे मेगु हे बल म्हितकीगु जूगु दु।रुसय् जुयाच्वंगु विश्वकप फुटबलया समूह चरणया दक्वं कासा क्वचायेधुंकूगु दु। आः नकआउट चरणया कासा जुइ।

कन्हय् शनिवाः अर्जेन्टिना व फ्रान्स दथुइ नकआउट चरणया न्हापांगु कासा जूवनाच्वंगु दुसा थ्व हे कासाय् न्हूगु बल न्हापांखुसी प्रयोग याइगु जूगु दु।समूहण चरणया कासाय् हाकुगु व तुयुगु रंग दुगु एडिडासया टेलसर १८ बल प्रयोग जुया वयाच्वंगु खः। आः नकआउट चरणया कासाय् टेलस्टारया हे ‘मिच्टा’ बल प्रयोग याइगु जूगु दु, थुगु बल नं एडिडासं हे तयार याःगु खः।

नकआउट चरणय् प्रयोग जूगु बलय् तुयुगु भागय् छुं भचा ह्याउँगु व छु भचा हाकुगु रंग तयाः डिजाइन यानातःगु दु। रुसया आधिकारिक रंगपाखें प्रभावित जुयाः थुकथंया बल डिजाइन यानाः तयार याःगु खः। रुसी भासं ‘मिच्टा’या अर्थ खः म्हगस।

फाउल प्रहारय् नं उपहार

फिफा विश्वकप फुटबल–२०१८ य् छगू हे टिमया सुं कासामि दकलय् फाउल प्रहारया शिकार जूगु दुसा व खः उपाधि दावेदार ब्राजिलया नेयमार। स्वीट्जरल्याण्ड विरुद्ध समूह चरणया न्हापांगु कासाय् जक नेयमारयात १० क्वः फाउल प्रहार जूगु दु।

फिफाया तथ्यांकया ल्याखं सन् १९९८ य् इंग्ल्याण्डया एलन शियररयात प्रहार याःगु फाउल लिपा थ्व छम्ह हे कासामियात प्रहार याःगु दकलय् अप्वः फाउल खः।

फाउल प्रहार निश्चित रुपं सुयागुं निंतिं उपलब्धि मखु। तर जारी विश्वकपय् नेयमारयात प्रहार याःगु फाउलं सुयात फाइदा नं जुया बिउगु दु। विश्वकपय् अपेक्षाकृत कासा प्रदर्शन याये मफुसां ब्राजिलं आशा यानातःम्ह नेयमारयात प्रहार याइगु फाउलं छगू ‘पब’्य् वइपिं गाहाकियात फाइदा जुया बिउगु दु।

रसिया विश्वकपय् नेयमारया प्रर्दशनं वाक्क दिक्क चायाच्वंगु इलय् ब्राजिलया उत्तरी लागाय् च्वंगु छगू पबं अजू चायापुगु घोषणा याःगु खः। उत्तरी रियोय् च्वंगु ‘सर वाल्टर पबं’ फेसबुकपाखें मैदानय् नेयमार ग्वःक्वः दइ हरेकपटक वया फ्यानतय्त सितिकं अय्लाः त्वंकेगु घोषणा याःगु खः।

‘मैदानय् जब नेयमार दइ, अबलय् बारय् दुपिं सकसितं निःशुल्क छगू शत अय्लाः सितिकं बीगु जुइ’ पबं फेसबुकय् च्वयातःगु दु। पबया थ्व पोष्ट सामाजिक संजालय् भाइरल जुया वनाच्वंगु जक मखसे नेयमारया प्र्रशंसकतय्सं नं उतिकं ययेकाच्वंगु दु।

पेनाल्टीइ ऐतिहासिक विश्वकप

रुसय् जुयाच्वंगु फिफा विश्वकपय् आपालं पत्याः याये थाकुगु लिच्वः पिहां वयाच्वंगु दु । विचाः मयाःगु टीमं उत्कृष्ट प्रदर्शन यानाच्वंगु दुसा दावेदार धयातःगु टीमया प्रदर्शन लुमंबकेह जुइ फयाच्वंगु मदु ।

थुकी दकलय् अप्वः लिच्वः लाकाच्वंगु धइगु पेनाल्टीं खः । विश्वकपय् मुक्कं ६४ गू कासा जुइ । थ्व ल्याखं बछि कासा क्वचायेधुंकूगु दु ।

(थ्व झ्वः कियाच्वनागु इलय् समूह चरणया प्यंगू जक कासा ल्यं दनि ।) समूह चरणया ४४ गू कासा क्वचाःगु इलय् तक १५ पेनाल्टी प्रहार जुइधुंकूगु दु ।जबकि सन् १९९८ य् फ्रान्सय् जूगु विश्वकपय् दकलय् अप्वः पेनाल्टी प्रहार जूगु खः । अबलय् मुक्कं कासाय् १८ गू जक पेनाल्टी जूगु खः । अथे हे सन् १९९० व २००२ या विश्वकपय् नं १८, १८ हे पेनाल्टी जूगु खः ।

थ्व ल्याखं विश्वकपया २१ औं संस्करणं पेनाल्टीइ न्हूगु कीर्तिमान कायम याइगु निश्चित दु । थुकथं हें पेनाल्टी प्रहार जुयाच्वन धाःसा फाइनल तक थ्यनीगु इलय् ३० पेनाल्टी प्रहार जुइगु संकेत खने दु । १५ पेनाल्टी प्रहारय् स्वंगू हे जक असफल जूगु दु ।