ने. सं. ११४४ कौलाथ्व पारू - नःलास्वनेगु

टाइसनयात छु जूगु जुइ ?

कासाख्यःया बाखंयात कयाः दयेकीगु अप्वः धयाथें फिल्म बक्सिङय् हे केन्द्रीत जुयाच्वनी । विशेषतः हलिउडय् गुलि नं कासानाप स्वापू दुगु फिल्म दयेकल, बच्छिं मल्याक फिल्मय् बक्सिङया हे बाखं जुयाच्वनी । थथे छाय् धाःसा फिल्मयात माःगु सकतां मसला बक्सिङय् दयाच्वनी । छुं ई न्ह्यः जक छगू समाचार वःगु खः– माइक टाइसनं भारतय् वयाः फिल्मय् म्हितीगु जुल । विजय देभराकोन्डाया मू भूमिका दूगु ‘लिगर’य् टाइनस नं खनेदइगु जूगु खः ।

तर सायद थ्व ख“ सुथां मलात धायेमाल । टाइसनया पूरा जीवन के छगू फिल्म सिबें छुं कम मजू, अले वया जीवनय् छगू न्हूगु मोड वःगु दु । नकतिनि हे धाःसां ज्यू, टाइसन अमेरिकामा छगू एयरपोर्टय् खनेदुगु खः, व नं ह्विलचेयरय् च्वनाच्वंगु अवस्थाय् । आखिर सुनां अनुमान याःगु खइ कि विश्व बक्सिङया हे छम्ह महान कासामि थुलि याकनं ह्विलचेयरय् च्वनेमाली धकाः । उकिं सकसिनं न्यनेगु सुरु याःगु दु, ‘टाइसनयात छु जूगु जुइ ?’

ताःई दत टाइसन ल्वगि थें जुयाच्वंगु । छगू कथं धायेगु खःसा टाइसन आः पुलांम्ह टाइसन मखयेधुंकल । अथेला टाइसन नकतिनि ५६ द“ जक हे दत, अपाय्सकं बुरा जूगु नं मखु । अय्नं टाइसनयात मियामी एयरपोर्टया टर्मिनलय् ह्विलचेयरय् च्वनाच्वंगु खनदत । अन वं थः छुं प्रशंसकत नाप सेल्फि नं काल । तर नं वया ख्वालय् न्हिलासू मदु, अझ अप्वः धयाथें इलय् वं रुमालं थःगु ख्वाः तकं त्वपुयाजुल । वया प्रशंसकतय् धाथेंया ग्याःचिकु खः– गनं टाइसनयात छुं बांमलाःगु ला जुयाच्वंगु मदु ?

छुं ई न्ह्यः टाइसन मेगु हे स्थितिइ न्यूयोर्कय् खनेदुगु खः । उबलय् व तुतां ज्वना जूगु खः । छगू कथं ला टाइसनया नितिं तुतां मदयेकं मगाःगु जुइधुंकल नं धायेगु याः । अय्नं अमेरिकी मिडियां धयाच्वंगु दु– टाइसनया उसा“ययात कयाः तसकं ग्याये माःगु मदु ।

हेभिवेट च्याम्पियन जुयाच्वंगु इलय् हे वयात जँ स्याइगु समस्या दुगु खः । जँया क्वय्या ब्व स्याइगु समस्यां यानाः हे टाइसन थःगु कासा जीवनपाखें याकनं संन्यास कायेत बाध्य जूगु खः ।

धायेगु नं याः, व्यावसायिक बक्सिङ कासामिया प्रशिक्षण व तयारी हे तसकं त्रूmर जुयाच्वनी । स्वये हे थाकुक उमिसं थःगु शरीरयात कष्ट बियाः प्रशिक्षण कयाच्वंगु जुइ । बल्लाःम्ह कासामि जुयाच्वंगु इलय् तक ला छुं जुइमखु, तर गुलि गुलि व बुरा जुयावनी, समस्या बुलुहुं बुलुहुं खने दयावइ । अले ई वंलिसे थ्व हे समस्यां तःधंगु आकार काइ । टाइसनयात जुयाच्वंगु नं थथे हे खः । नत्रसा कासामि जुयाच्वंगु इलय् टाइसनयात टाइसन जक मखु, ‘आइरन माइक’ तकं धाइगु । अर्थात व धात्थें हे न बराबर छाः । आः व हे नया म्ह खतं नःगु दु । सायद टाइसन मानसिक ल्याखं नं कमजोर जूगु जुइमाः । छुं ई न्ह्यः जक वया छगू सनसनीपूर्ण अन्तर्वाता वःगु खः । थ्याक्क धायेगु खःसा वया थेरापिस्ट सिन म्याकफरल्यान्डं छुं दिं न्ह्यः छगू पोडकास्ट दयेकूगु खः, टाइसननापया ख“ल्हाबल्लाया ग्वाहालिं । उकी भचा अप्व हे दार्शनिक पहः वयेक टाइसनं धाःगु खः, ‘सकसिनं स्यू, छन्हु झी सकलें सि हे माः, न्हापा लिपा जक खः ।’

खास ख“, टाइसन थथे ख“ ल्हाना जुइम्ह हे मखु । वं थथे तक धाःगु खः, ‘गुबलय् गुबलय् जिं न्हाय्कं स्वयेगु यानाः, उबलय् उबलय् जिगु ख्वालय् जिं हाकुगु हाकुगु फुतिफुति खनाः । उबलय् जित ताइगु, सायद जिगु म्वायेगु दिं क्वचाया वनाच्वंगु थें च्वं । सायद थ्व दिं अझ याकनं न्ह्यःने वयाच्वंगु दु ।’ टाइसनं छ्यःगु थ्याक्क ख“ग्वः ला ‘एक्सपायरेसन डेट’ खः । अर्थात वया जीवनया नं ‘एक्सपायरेसन डेट’ न्ह्यःने न्ह्यःने वयाच्वंगु दु । अझ वया इच्छा खः, याउ“क सीगु, दुःख मनसें सीगु ।
तर आः व हे टाइसन ह्विलचेयर खनेदःवःगु दु । व पोडकास्टय् टाइसनं मेता छता इच्छा नं प्वंकूगु खः । व खः, ‘छुं हल्ला मयासें सिना वनेगु, चुपचाप ।’

सायद आः तक टाइसनयात जीवनं स्यंगु शिक्षा थ्व हे खः कि ? व पोडकास्टय् टाइसनं ध्यबा धयागु छुं हे मखु धकाः नं धाल । मचाबलय् ध्यबाः मदया तसकं दुःख स्यूम्ह खः, टाइसन् । लिपा ल्याय्म्हया इलय् बक्सिङ म्हितेवं वया जीवनय् लखंलख जक मखु, करोडौं डलर दुहां वल । तर थ्व हे ध्यबा बुलुहुं मदया नं वन । धाथें ध्यबाः गन वन, टाइसनं नं मस्यू । वया आःया विश्वास खः, ‘ध्यबां सुख दइमखु, अःखतं दुःख जक दइ ।’

टाइसनया धापु खः, ‘यक्व ध्यबा दतकि अझ यक्व समस्या नं वइ । थःगु जःखः च्वंपिंस माया याइगु धयागु हे ध्यबायात जक खः ।’

छगू इलय् बक्सिङया रिंगय् अजय जुयाच्वंम्ह टाइसन आः उकिया अःखः स्थितिइ दु । बक्सिङ गुलि नाटकीय जुइ यः, थ्व कासा म्हितिपिनि जीवन नं उतिकं नाटकीय जुइयः । टाइसनया जीवन स्वयाः थुलि ला विश्वास याये हे माः ।