नेपाःया फाइनल म्हितेगु सम्भावना दनि ला ?

येँ – मलेशियाय् जुयाच्वगुं एशिया कप छनोटय् नेपालं सिंगापुरयात ४ विकेटं बुकूगु दु । सिंगापुरं न्हापां ब्याटिङ यासें बिउगु १५२ रनया लक्ष्य नेपालं २८.१ ओभरय् ६ विकेटया क्षतिइ पूवंकूगु खः । न्हापां ब्याटिङ याःगु सिंगापुर ४२ ओभरय् १५१ रन दयेका अलआउट जूगु खः ।

मलेशियाया युकेएम ओभल मैदानय् जुगू कासाय् ललित राजवंशी व सन्दीप लामिछाने स्वगूं स्वगूं विकेट काःगु खःसा सोमपाल कामीं निगू व वसन्त रेग्मीं छगू विकेट काःगु खः । सिंगापुरपाखें कप्तान चेतन सुर्यवंशीं सर्वाधिक ६० रन दयेकल । अथेहे अनिश पारमं ३१ व कार्थिकेयानं २० रन दयेकूगु खःसा मेपिं ब्याट्सम्यानतय्सं बांलाःगु प्रदर्शन यायेमफुत ।

नेपाःया लागि अनिल शाहं ४३ , दीपेन्द्र सिहं ऐरी ३३ ज्ञानेन्द्र मल्लं २९ रन व सागर पुनं १४ दयेकूगु खः । नेपाःया कप्तान पारस खड्का ११ रनय् आउट जूगु खः । कासाय् नेपाःपाखें स्वंगू विकेट काःम्ह ललित राजवंशी म्यान अफ द म्याच जुल ।

नेपाल थौैं हङकङलिसे म्हिती । एशिया कप छनोटया फाइनलय् थ्यंकेत नेपालं हङकङयात तःधंगु अन्तरं बुकां जक मगाः ओमानं युएइयात नं बुकेमाःगु दु । अथे जुल धाःसा नेपाः व युएइया समान ६ अंक दइ अले रन रेटया आधारय् नेपाः व युएइ मध्ये छगू टिम फाइनलय् वनी । ओमान ७ अकं सहित समूहया शीर्ष थासय् दु ।