पोखराय् च्यागू कासा, ६६२ म्ह कासामि
येँ – झिंस्वक्वःगु दक्षिण एशियाली खेलकूद (साग) अन्तर्गत पोखराय् जुइगु च्यागू कासाय् जक ६६२ म्ह कासामितय्सं ब्वति काइगु जूगु दु । मंसिर १५ गते निसें २४ गते तक जुइगु सागय् २७ गू कासा दुथ्यानाच्वंगु दु । मेखे नेपालं पदकया आशा यानातःगु प्याराग्लाइडिङ्ग धाःसा मजुइगु जूगु दु ।
नेपाः बाहेक मेगु देय्पाखें प्याराग्लाइडिङ्गया निंतिं सुं कासामिया नां दर्ता मयायेवं थ्व कासा मजुइगु निश्चित जूगु खः । प्याराग्लाइडिङ्ग मजुइगु जुइवं मुक्क २६ गू कासा मध्ये पोखराय् जक च्यागू कासा जुइत्यंगु खः । पोखराय् जुइगु च्यागू कासाय् ४०१ म्ह मिस्त व २६१ म्ह मिजं कासामितय् सहभागी जुइगु खँ पोखराया प्रचारफ्रसार संयोजक केशव पाठकं धयादीगु दु ।
अथेहे पोखराय् जुइगु कासाय् १७२ म्ह अफिसियल सहभागी जुइ । थन जुइगु च्यागुलिं कासाय् नेपालं ब्वति कयातःगु दु, गुकी नेपाःपाखें १०२ म्ह मिस्त व ५२ म्ह मिजं कासामिं ब्वति काइसा ३० म्ह अफिसियल दइ ।माल्दिभ्सं आर्चरी, भारोत्तोलन व ट्रायथोलनय् ब्वति काःगु मदु । माल्दिभ्सं म्हितीगु न्यागू कासाय् ६१ म्ह मिसा व २६ म्ह मिजं कासामि दुथ्यानाच्वंगु दु ।
भारतं आर्चरी व क्रिकेट बाहेक फुक्कं धेंधेंबल्लाखय् ब्वति काइ । भारतपाखें ४१ म्ह मिजं व ६१ म्ह मिसा कासामिं ब्वति काइ । बंगलादेशपाखें खुगू कासाय् मिजं ४४ म्ह व मिसा ५५ म्ह कासामिं ब्वति काइ । बंगलादेशं मिस्तय् फुटबल व ट्रायथोलनय् ब्वति मकाः । पाकिस्तानं नं मिस्तय् फुटबल , मिस्तय् क्रिकेट व ट्रायथोलनं ब्वति मकाः ।
पाकिस्तानं मिजं ३८ म्ह व मिसा ३५ म्ह कासामिं ब्वति काइ । श्रीलंकां च्यागुलिं धेंधेंबल्लाखय् ब्वति काःगु दु । थुकीया निंतिं ४६ म्ह मिजं व ८१ म्ह मिसा कासामितय्सं धेंधेंबल्लाः याइ । भूटानं ह्याण्डबल, मिस्तय् फुटबल, बीच भलिबल व ट्रायथोलनं ब्वति मकाः । भूटानपाखेंप्य.गू कासाया निंतिं मिजंत १४ म्ह व मिस्तय् खुम्हेस्यां ब्वति काःगु खः ।
पोखराय् जुइगु कासा मध्ये ब्याडमिन्टन १५ गते ब्याडमिन्ट कभर्ड हलय् जुइ । मिस्तय् क्रिकेट १६गते पोखरा रंगशाला दुनेया क्रिकेट मैदानय् जुइसा आर्चरी व ट्रायथोलन १६ गते निसें सुरु जुइ । मिस्तय् व मिजंतय् ह्याण्डबल १८ गते व बीच भलिबल, भारोत्तोलन व मिस्तय् फुटबल ९ गते निसें सुरु जुइ । बिच भलिबल बाराहीघाटय् च्वंगु बीच भलिबल कोर्टय् जुइ । भारोत्तोलन माटेपानीइ च्वंगु केसी क्याटरिङ्ग हलय् जुइ ।
LEAVE YOUR COMMENTS