नारायणघाट–मुग्लिन सतकया जानकारी एसएमएसपाखें

येँ – स्वनिगः दुहां वयेगु पश्चिमी लागाया प्रमुख नाकाया रुपय् दयाच्वंगु नारायणघाट–मुग्लिन सतकया अवस्था बारे आः एसएमएसपाखें जानकारी काये फइगु जूगु दु। गबले चाली व गबले बन्द जुइ धइगु छुं ठेगान हे मदुगु उगु सतकखण्डया अवस्था बारे जानकारी बीत एसएमएस सेवा संचालनय् हःगु खः।

गबलें चलः वनाः, गबलें सतक हे स्यनाः, गबलें सतक दुर्घटना व गबलें लँ दथुइ सवारी साधन स्यनाः सतक अवरुद्ध जुइगुलिं यानाः उगु सतकखण्ड जुयाः वयेवने याइपिं यात्रुतय्सं सास्ति फयेमालाच्वंगुयात ध्यानय् तयाः उकथंया सेवा संचालनय् हःगु खः।

जिल्ला ट्राफिक प्रहरी ज्याकू चितवनं स्थानीय कालिका टिभी व रेडियोलिसेया सहकार्यय् एसएमएस सेवा संचालनय् हःगु खः। उगु सेवा कायेगु निंतिं मोबाइलया म्यासेज बक्सय् वनाः ‘एनएमटी’ टाइप यानाः ३४८४८ य् छ्वयेवं सतकखण्डया स्थिति बारे जानकारी काये फइ। थ्व स्वयां न्ह्यः फेसबुकपाखें जक सूचना बीगु याना वयाच्वंगु खः ।