दाहाल भारत वनेत हथायचाल

येँ (नेपालभाषा टाइम्स)÷ प्रधानमन्त्री पुष्पकमल दाहालं वैशाखया स्वंगूगु वाःपाखे भारत भ्रमण याइगु खँ सीदुगु दु । परराष्ट्र मन्त्री मदुगु कारणं भारत भ्रमणया खँ न्ह्याके मछिनाच्वंगुलिं म्हिगः आइतवाः कांग्रेस नेता एनपी साउदययात परराष्ट्र मन्त्रीइ नियुक्त यायेधुंकाः आः याकनं हे दाहाल भारत वनीगु खँ धाःगु दु । प्रधानमन्त्रीया दाहालया प्रमुख राजनीतिक सल्लाहकार हरिबोल गजुरेलं वैशाखया स्वंगूगु वाःपाखे दाहाल भारत वनेफुगु खँ धयादीगु दु ।

भारत भ्रमण बारे सहलह यायेत शुक्रवाः भारतीय राजदूत नवीन श्रीवास्तवं प्रधानमन्त्री दाहालयात नापलायेधुंकूगु दु । थ्वयां छुं ई न्ह्यः राजदूत श्रीवास्तवं उपप्रधानमन्त्री व गृहमन्त्रीयात नं नापलाःगु खः । प्रधानमन्त्री दाहाल भारत भ्रमण यायेत हथाय् चाःगुलिं हे म्हिगः काचाकाचां साउदयात परराष्ट्र मन्त्रीइ नियुक्त याःगु खः । मखुसा सत्ता गठबन्धन दुने वैशाख १० गते जुइगु उपचुनाव लिपा जक मन्त्रिपरिषद पुनर्गठन यायेगु सहमति जुयाच्वंगु खः ।

दाहाल थौंकन्हय् थः भारतलिसे सतीम्ह धकाः क्यनेत हथाय् चायाच्वंगु दु । थःगु सत्ता ल्यंकातयेगु निंतिं भारतयात ह्ययेकेमाःगुलिं वय्कः भारत वने हथाय् चायाच्वंगु खः । परराष्ट्र मामिला सम्बन्धी जानकार सञ्जय उपाध्यायं बिबिसीलिसे खँ ल्हासें दाहाल भारतीयतय् न्ह्यःने थः भारतलिसे सहकार्य यायेफुम्ह सही मनू खः क्यनेत हथाय् चायाच्वंगु खँया विश्लेषण यानादीगु दु । दाहाल थःगु सरकारया भविष्ययात स्वयाः नं भारत वनेत हथाय् चायाच्वंगु बिचाः वय्कःया दु ।

संविधानसभाया चुनाव लिपा न्हापांखुसी प्रधानमन्त्री जूम्ह दाहालया उबलय् निसें भारतलिसेया स्वापू बांमलाः । उबलय् ‘क्रमभंगता’ धासें दाहाल थः प्रधानमन्त्री जुइधुंकाः न्हापांखुसी चीन भ्रमणय् वंगु खः । मखुसा थ्वयां न्ह्यः नेपालय् न्ह्याःम्ह प्रधानमन्त्री जूसां प्रधानमन्त्री जुइवं न्हापांखुसी भारत भ्रमणय् वनेगु यानाच्वंगु खः । न्हापांखुसी प्रधानमन्त्री जूबलय् चीनलिसे सतिक लाःम्ह धकाः क्यनेत स्वःम्ह दाहाल थौंकन्हय् धाःसा भारतलिसे सतिम्ह धकाः क्यनेत स्वयाच्वंगु दु ।

थुकिया सन्देश बीकथं दाहालं बेइजिङ निमन्त्रणा छ्वयाहःसां चीनय् जूगु बोआओ सम्मेलनय् नेपाःपाखें उच्चस्तरीय प्रतिनिधिमण्डल मछ्वल । अथेहे थांैकन्हय् दाहाल चीनया बेल्ट एण्ड रोड विषयय् नं मौन च्वनाच्वंगु धापु उपाध्यायया दु । ‘दाहालं थ्व फुक्क यानाच्वंगु न्हूदिल्लीयात थः न्हापा स्वयां फरक जुइधुंकल धकाः क्यनेत खः’ उपाध्यायया धापु दु ।