सर्वोच्चपाखें संसद पुनर्स्थापना, १३ न्हु दुने पुनर्स्थापित संसद अधिवेशन सःतेत आदेश

येँ – सर्वोच्च अदालतं प्रधानमन्त्री केपी शर्मा ओलीं वंगु पुस ५ गते भंग याःगु संसद पुनर्स्थापना यायेत आदेश बिउगु दु । म्हिगः सर्वोच्च अदालतं अफिस टाइम लिपा नं सुनुवाई यासें थ्व आदेश बिउगु खः । लिसें सर्वोच्चं आः वइगु झिंस्वन्हुया दुने संसदया बैठक सःतेत नं निर्देशन बिउगु दु ।
संयोगवश प्रधानमन्त्री केपी ओलीया म्हिगः ७० दँ बुन्हि नं लाःगु खःसा संसद पुनर्स्थापना वय्कःया लागिं दुःखद् उपहार जुया बिउगु दु ।

संसद विघटन विरुद्ध बहस यायेगु झ्वलय् वरिष्ठ अधिवक्ता शम्भु थापां सर्वोच्चं संसद पुनर्स्थापना जक यानां मगाः संसदया अधिवेशन सःतेगु आदेश समेत बीमाः धकाः माग यानादीगु खः । सर्वोच्चं संसद पुनस्र्थापना याःसां नं प्रधानमन्त्रीं संसदया बैठक सःतेत अलमल यायेफु धासें अदालतं हे बैठक सःतेगु न्हि समेत क्वःछिना बीमाः धकाः नं थापां थःगु बहसया झ्वलय् धयादीगु खः ।

म्हिगः बहनी लिबाक्क तक च्वनाः प्रधानन्यायाधीश चोलेन्द्र शम्शेर जबरा नापं न्यायाधीशपिं विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल व तेजबहादुर केसीया संवैधानिक इजलासं संसद विघटन बदर जुइगु फैसला याःगु खः । प्रधानमन्त्री ओलीया सिफारिसय् राष्ट्रपति विद्यादेवी भण्डारीं वंगु पुस ५ गते संसद विघटन यानाः वैशाख १७ व २७ गते निर्वाचन यायेगु घोषणा याःगु खः ।

सर्वोच्चं म्हिगः थःगु निर्णय न्यंके न्ह्यः प्रधानमन्त्रीं याःगु संसद विघटन विरुद्ध रिट दायर याःपिं निवेदकपिंत नं इजलासय् सःतूगु खःसा अदालत परिसरय् सुरक्षा व्यवस्था कडा याःगु खः ।

सर्वोच्चया थ्व फैसला वयेवं कानूनविद्तय्सं उकियात लसकुस यासें आः थ्वयां लिपाया राजनीतिक डिस्कोर्स बारे बिचाः तयेगु याना हःगु दु । संविधानविद् डा. पूर्णमान शाक्यं सर्वोच्चया निर्णय लिपा प्रधानमन्त्रीं तुरुन्त हे राजीनामा बीमाःगु बिचाः तयादीगु दु । नेपालभाषा टाइम्सलिसे खँ ल्हासें वय्कलं धयादिल, ‘यदि प्रधानमन्त्रीं राजीनामा मबिल धाःसा वय्कलं संसदय् अविश्वासया प्रस्ताव सामना याये माली ।’

संसद विघटन थेंज्याःगु असंवैधानिक ज्या याःगु कारणं आः राष्ट्रपतियात नं छुं कथं दण्डित यायेमाःगु खँ वयाच्वंगु दु । तर आः हे राष्ट्रपतियात पदच्यूत यायेगु धाःसा सम्भव मदुगु खँ डा. शाक्यं धयादिल । ‘राष्ट्रपतियात पदच्यूत यायेगु खःसा महाअभियोग तयेमाः, उकियात संसदया निगू तिहाइ मतं पारित याःसा जक पारित जुइ, आःया कन्डिसन स्वयेगु खःसा थ्व सम्भावना मदु’ वय्कलं धयादिल ।

‘अथे खःसां आः गेम चेन्ज जुइधुंकूगु दु, अथे जुयाः संसदय् राष्ट्रपति विरुद्ध महाअभियोग वल धाःसा उकियात पारित याइगु सम्भावना मदु धाये फइ मखु’ डा. शाक्यं स्पष्ट यानादिल ।

उकथं हे जनता समाजवादी पार्टीया नेता राजेन्द्र श्रेष्ठं संसद विघटन लिपा संविधान ट्राय्कं पिहां वंगु खःसां सर्वोच्च अदालतं प्रधानमन्त्रीया सर्वसत्तावादयात पराजित याना बिउगु प्रतिक्रिया बियादीगु दु । संसद विघटन विरुद्ध रिट तयादीम्ह अधिवक्ता कंचनकृष्ण न्यौपानें म्हिगः सर्वोच्च परिसरय् हे सञ्चार माध्यमतलिसे खँ ल्हासें सर्वोच्चया थ्व फैसलां देशय् गलत नजिर स्थापना जुइगुपाखें बचे जूगु व आः प्रधानमन्त्रीयात नैतिक संकट वःगु दु धकाः प्रतिक्रिया बियादीगु दु ।

सम्बन्धित बुखँ

LEAVE YOUR COMMENTS