सम्पदा अभियन्तातय्त हना

येँ-सेभ नेवाः भ्यालिं स्वन्ति नखः व न्हूदँ ११४२ या लसताय् सम्पदा संरक्षण अभियन्तातय् हंगु दु । नेपाल संवत् ११४२ न्हूदँया लसताय् जूगु तुच्चा ज्याझ्वःया दथुइ नेपाल बार व सर्वोच्च बार एशोसियसनया नायःपिं चण्डेश्वर श्रेष्ठ व पूर्णमान शाक्ययात विशेष हनेज्या याःगु खः । अथे हे स्वनिगःया थीथी सम्पदा संरक्षण व संवद्र्धनय् सक्रिय अभियन्तातय्त हंगु खः ।

संस्थाया नायः शैलेश बरेया सभापतित्वय् जूगु ज्याझ्वः वय्कलं हे न्ह्याकादीगु खःसा ज्याझ्वलय् गुथि विधेयकलिसें धार्मिक, सांस्कृतिक, पुरातात्विक महत्वया सम्पदा नापं फल्चा, सतः, हिति देगः,चैत्य आदि संरक्षण व उकिया अस्तित्व ल्यंकेगु ज्याय् सक्रिय ख्वीम्ह स्वयां अप्वः अभियन्तातय्त हनेज्या याःगु खः ।

ज्याझ्वलय् नेपाल संवत् न्हूदँ राष्ट्रिय समारोह समितिया नायः निरञ्जनरत्न शाक्य, सांसदपिं कृष्णगोपाल श्रेष्ठ व भिमसेनदास प्रधान, नेवाः देय् दबूया संरक्षक मल्ल के. सुन्दर पाहांकथं झायादीगु खः ।