आः केन्द्र व फुक्क हे प्रदेशय् एमाले प्रतिपक्षी

येँ – प्रदेश १ या मुख्यमन्त्री भीम आचार्यया राजीनामा लिपा नेकपा एमाले संघंनिसें फुक्क हे प्रदेशय् प्रतिपक्षी कित्ताय् थ्यंगु दु । वंगु आम निर्वाचन लिपा केन्द्रंनिसें देय्या प्यंगू प्रदेशय् एमालेया सरकार नीस्वंगु खः । म्हिगः १ नम्बर प्रदेशया मुख्यमन्त्री आचार्यया राजीनामा लिपा संघ व प्रदेशय् विपक्षी कित्ताय् थ्यंगु दु ।

आचार्य वंगु भदौ १० गते मुख्यमन्त्री जूगु खःसा म्हिगः विश्वासया पक्षय् मतदान जुइ न्ह्यः हे राजीनामा बियादीगु खः । थ्व स्वयां न्ह्यः गण्डकी, लुम्बिनी, बागमति व १ नम्बर प्रदेशय् एमाले नेतृत्वया सरकार दुगु खः । वंगु चुनावय् एमाले व माओवादी केन्द्र दथुइ जूगु चुनावी गठनबन्धनं प्रतिनिधिसभाय् निगू तिहाइ मत हःगु खःसा खुगू प्रदेशय् स्पष्ट बहुमत हःगु खः ।
थ्वहे झ्वलय् भीम आचार्यया राजीनामा लिपा प्रदेश १ य्

नेकपा एकीकृत समाजवादीया नेता राजेन्द्र राईं मुख्यमन्त्रीया दावी पेश यानादीगु दु । प्रदेश प्रमुख सोमनाथ अधिकारी प्यासीं सरकार गठनया आह्वान यायेवं वय्कलं ४९ म्ह सांसदया हस्ताक्षर सहित मुख्यमन्त्री दावी यानादीगु खः । राईयात एकीकृत समाजवादी, कांग्रेस, माओवादी जसपाया समर्थन दु । प्रदेश १ य् सरकार गठनया नितिं ४७ म्ह सांसदया हस्ताक्षर दःसा गाः । मुख्यमन्त्री आचार्यं राजीनामा बीधुंकाः प्रदेश प्रमुख अधिकारी नेपाःया संविधानया धारा १६८ या (२) कथं सरकार गठनया नितिं दावी पेश यायेत आह्वान याःगु खः ।