विमला, कमला मानन्धरया अबु मन्त

येँ– येँ मनपा २८ वडाया पुलांम्ह अध्यक्ष व जनचिकित्सालयया संस्थापक मिठ्ठाबहादुर मानन्धर थौं सुथय् मन्त । छाती भचा खराबी खनेदुगुलिं अस्पताल यंकूम्ह वय्कः गंगालाल अस्पतालय् वासः याकुयाकुं थौं सुथय् ३ बजे पाखे मदुगु खः । आकाझाकां सासः ल्हाये थाकुया वयेवं आइसियुलय् तयाः उपचार याकाच्वंगु इलय् वय्कः मदुगु खँ छेँजःपिंसं धाःगु दु ।

वय्कः नेपाल लिपि गुथिया मू दुजः व जनचिकित्सालयया अध्यक्ष विमला मानन्धर व नेपालभाषा क्लबया अध्यक्ष व कन्या मन्दिर माविया नेपालभाषा शिक्षिका कमला मानन्धरया अबुजु खः । वय्कःया खुम्ह म्ह्याय्पिं दी ।

वय्कःया अन्त्येष्टि थौं हे पशुपतिइ जुइत्यंगु दु । वय्कःयात चिधिकःम्ह म्ह्याय् कमला मानन्धरं मि तइगु खँ धाःगु दु ।
मदुम्ह मानन्धर येँ महानगरपालिका तत्कालीन २८ वडा (थौंकन्हय् २५ वडा)या पुलांम्ह वडाअध्यक्ष नापं समाजसेवी नं खः ।