माओवादीया ‘सम्मेलन’ चांचां हे छाय् ‘महाधिवेशन’ जुल ?

येँ – नेकपा (माओवादी केन्द्र) या राष्ट्रिय सम्मेलन चांचां हे तःमुँज्या (महाधिवेशन) य् रुपान्तरण जूवंगु खनाः कार्यकर्तात अजूचाःगु दु । सम्मेलनय् धकाः ब्वति काः वःपिं कार्यकर्तात महाधिवेशनय् थ्यंगु खनाः अन्यौलग्रस्त नं जूवंगु दु । सम्मेलन यायेगु धकाः घोषणा जुयाच्वंगु ज्याझ्वः आकाझाकां महाधिवेशन जुइवं कानुनी समस्या वइगु खः लाकि धइगु नं न्ह्यसः पिदंगु दु ।

तर माओवादी सूत्रं धाःकथं थथे यायेबलय् छुं कानुनी समया वइगु खः लाकि धकाः पार्टी नेता मुक्ति प्रधानयात निर्वाचन आयोगय् छ्वयाः बुझे याके बिउगु खः । आयोगया दुजःतलिसे खँ ल्हायेधुंकाः प्रधानं महाधिवेशन यायेबलय् छुं पंगः वइ मखु धकाः पार्टीयात जानकारी याकूगु खः । वयां लिपा पार्टीं चांचां हे सम्मेलनयात महाधिवेशन दयेकाछ्वयेगु निर्णय याःगु खः । सूत्रतय्सं धाःकथं सम्मेलनयात महाधिवेशन दयेकेगु खँ दकलय् न्हापां अध्यक्ष दाहालं हे पित हःगु खः । थुकिया बारे वय्कलं पार्टीया छुं नेतातलिसे सल्लाह यानादीगु खःसा वयां लिपा मुक्ति प्रधानलिसे सल्लाह यानादीगु खः ।

प्रधानं कनादीकथं निर्वाचन आयोगया पदाधिकारीतय्सं मुँज्याया नां न्ह्यागु हे तःसां थःपिनि सरोकारया विषय मखु, नियम कथं पार्टीया न्हूधाः यानाः निर्वाचित पदाधिकारीतय्गु नां आयोगय् बुझे यात धाःसा उकियात स्वीकार यायेगु जुइ धकाः लिसः बियाहःगु खः । माओवादीं छुं जुयाः थुकियात सम्मेलन कथं माने याना यंकल धाःसा मेगु निदँया दुने हे हानं तःमुँज्या याये मालीगु जुयाः अज्याःगु झंझटपाखें मुक्त जुइत नं आः हे तःमुँज्या याना छ्वःगु खँ नं धाःगु दु । माओवादीं सम्मेलन यायेगु धाःसां नं उकिया तयारी धाःसा मुक्कं तःमुँज्या थें च्वं हे याना वयाच्वंगु खः ।